Survey ipahigayon dinhi sa Sugbo

CEBU, Philippines - Ang Philippine Statistics Authority (PSA) mopahigayon og survey sa mga balay- patigayon dinhi sa Sugbo ug sa ubang mga probinsiya sa Central Visayas.

Mao kini ang gipahibalo ni Noel Rafols, ang tigpamaba sa PSA nga kaniadto mao ang National Statistics Office (NSO). Gipasabot ni Rafols nga ang tumong sa pagpahigayon og survey sa mga business establishment aron mahibaw-an kun midaghan ba ang mga magpapatigayon.

Ang mopahigayon sa survey mao ang mga kawani nga nadistino sa National Statistical Coordination Board(NSCB), Bureau of Agricultural Statistics (BAS) ug ang Bureau of Labor and Employment Statistics (BLES).

Gipasabut ni Rafols nga kapahimuslan ang makuha nilang kasayuran sa nagkadaiyang mga balay-patigayon dinhi sa Sugbo ug Central Visayas nga posibling magamit alang sa pagpalambo sa serbisyo sa kagamhanan.

Si Rafols miingon nga malakip usab sa maong survey ang remittances sa mga negosyante sa ilang mga buhis ngadto sa kagamhanan.

Apan iyang gipasabut nga dili kini pagpanggukod sa mga negosyante kay ang maong katungdanan iya man sa Bureau of Internal Revenue.

Gitataw hinuon ni Rafols nga ang maong survey usa lang sa nag-unang tahas sa PSA nga mao ang pagpreparar ug pagpahigayon og "periodic censuses on population, housing, agriculture, fisheries, business, industry and other sectors of the economy."  (BANAT NEWS)