DSWD nagsugod na sa pagpatuman sa UPLIFT

CEBU, Philippines — Gisugdan na sa Department of Social Welfare and Development (DSWD)-7 ang pagpatuman sa Unified Package for Livelihood, Industry, Food, and Transport (UPLIFT) sa Central Visayas ug giawhag ang mga benepisyaryo nga sundon ang schedule sa payout ug mag-andam og digital wallet alang sa mosunod nga cash assistance.

Atol sa Kapihan sa Philippine Information Agency (PIA) niadtong Martes, nagkanayon si DSWD-7 Regional Director Shalaine Marie Lucero nga ang programa nga giumol ubos sa Executive Order No. 110 nagtinguha nga matabangan ang 7.5 milyones ka mga panimalay sa tibuok nasud pinaagi sa tulo ka grupo sa mga benepisyaryo.

Ang unang grupo naglangkub sa mga benepisyaryo sa Pantawid Pamilyang Pilipino Program (4Ps) ug Walang Gutom Program nga makadawat og usa ka higayon nga P2,000 nga ayuda.

Matud ni Lucero, nadawat na sa tanang 4Ps beneficiaries sa Central Visayas ang maong ayuda pinaagi sa ilang Land Bank cash cards samtang ang mga benepisyaryo sa Walang Gutom makadawat niini panahon sa pagkuha sa ilang food packages. Ang ikaduhang grupo naglangkub sa mga kabus nga giila pinaagi sa 2024 Community-Based Monitoring System (CBMS) diin makadawat kini og P2,000 matag bulan gikan sa Hulyo hangtud sa Disyembre.

Sa Central Visayas, adunay 152,672 ka target nga mga pamilya ubos niini nga grupo.

Si Lucero nagkanayon nga ang payout karong Hulyo himuon pinaagi sa manual distribution, apan ang mosunod nga mga ayuda ipasulod na pinaagi sa digital wallets sama sa GCash o Land Bank accounts.

Giawhag usab niya ang mga benepisyaryo nga magkuha og national ID ug magparehistro sa digital payment account. Nagbutang usab ang DSWD og mga help desk aron motabang sa PhilSys registration, CBMS validation ug digital wallet enrollment.

Aron masiguro ang hapsay ug luwas nga pagpanghatag sa ayuda himuon ang payout sa mga lapad nga gymnasium nga magsilbi sa nagkahiusang mga barangay.

Gipahinumduman usab ni Lucero ang mga benepisyaryo sa 4Ps ug Walang Gutom nga dili moadto sa payout venues sa group 2 tungod kay adunay lahi nga pamaagi sa paghatag sa ilang ayuda.

Samtang, si Philippine Statistics Authority (PSA) Regional Statistical Services Office-7 Chief Statistical Specialist Leopoldo Alfanta, Jr. nagkanayon nga ang 2024 CBMS maoy gigamit nga basehan sa pag-ila sa mga kabus ug duol sa kakabus nga mga benepisyaryo, samtang ang national ID gamiton sa pag-ila sa ilang identity.

Giawhag niya ang publiko nga makigtambayayong sa mga kalihokan sa gobiyerno sa pagtigom og datos ug ang husto ug tinuod nga impormasyon importante aron ang ayuda mahatag sa angay nga mga benepisyaryo.

Sa bahin sa Social Security System (SSS) ang ilang papel mao ang paghatag sa DSWD sa listahan sa mga kwalipikadong low-income members alang sa ikatulong grupo sa programa.

Matud ni SSS Visayas Central 1 Division Acting Head Eric Coronado nga ang mga kwalipikado mao ang mga empleyadong miyembro nga adunay labing menos usa ka kontribusyon sa SSS sa 2025 o 2026 ug adunay monthly salary credit nga P20,000 paubos apan dili apil sa maong programa ang mga pensioner. Ang mga kwalipikadong benepisyaryo sa group 3 makadawat sa ilang ayuda pinaagi sa ilang narehistrong SSS disbursement accounts.

Giawhag usab sa SSS ang mga miyembro nga i-update ang ilang contact information ug disbursement accounts aron masiguro ang hapsay nga pagpasulod sa mga benepisyo ug ayuda. — (BANAT NEWS)