Mayor Chiong mimando nga usbon ang pamaagi sa koleksyon

CEBU, Philippines — Tungod sa nahitabong pagkahanaw sa P12 milyones gikan sa panudlanan sa Siyudad sa Naga, nakigtagbo si Mayor Valdemar Chiong sa ilang Local Finance Council ug sa taga City Legal Office aron hisgutan ang mga pamaagi sa pagkolekta ug pagdeposito niini.

Si Chiong nibutyag nga ilang gituki ang kabag-ohan sa sistema aron di na masubli pa ang panghitabo sa pagkahanaw sa P12 milyones sa pundo sa dakbayan.

Una niini, usa ka 44 anyos nga liquidating officer sa Naga ang gikustodiya sa kapolisan human nahibaw-an sa Commission on Audit nga nawala ang maong P12 milyones gikan pa sa tuig 2022 hangtud ning tuiga.

Apan tungod kay gisubay pa ang tanan ug wala siya masakpi sa akto nga nangawkaw sa panudlanan sa siyudad, gibuhian kini apan gikatakda siya nga pasakaan og kasong malversation of public funds.

Si Police Lt. Col. William Homoc, hepe sa kapolisan sa siyudad niingon nga ipaagi sa regular filing ang kaso kay katapusan nga gihimo ang transaksyon niadto pang Pebrero 13 ning tuiga. Ang mao nga liquidating officer mao ang gitugyanan sa koleksyon sa kwarta ug siya sab ang responsaible sa  pagdeposito niini.—   IBM BANAT NEWS