Radioman sa Misamis gipusil patay sulod sa broadcast booth

CEBU, Philippines — Usa ka magsisibya sa radyo sa Misamis Occidental ang gipusil patay samtang nag-host sa iyang programa sayo sa buntag kagahapon.

Si Juan Tumpag Jumalon gipusil kini sa ulo sa wala mailhing kriminal samtang nagpahigayon on air sa iyang programa sa radyo.

Base sa report sa Calamba Municipal Police Station nga ang kriminal kinsa adunay dalang pistola nisulod sa gate sa balay ni Jumalon nga nagsilbi usab nga radio station sa Gold FM 94.7.  Giduol sa kriminal si Jumalon sulod sa broadcast booth ug gipusil duha ka higayon ug sa wala pa kini mosibat gilabni sa maong kriminal ang gold nga kwentas sa biktima.

Ang maong pagpamusil nakuha kini sa livestream sa show ni Jumalon.

Ang 94.7 FM Gold Radio Calamba gipanag-iya ni Jumalon diin nahimutang kini sa iyang panimalay sa Barangay Don Bernardo A. Neri sa Calamba.

Sa report nga nadawat ni Brigadier General Ricardo Layug, Jr., director sa Police Regional Office-10 sa Cagayan de Oro gikan sa iyang kapolisan nga patay diha-diha si Jumalon gumikan sa duha ka samad pinusilan diha sa iyang nawong.

Gikondena sa National Union of Journalists of the Philippines ang pagpatay kang Jumalon kinsa nailhan usab nga “DJ Johnny Walker.”

Ang Presidential Communications Office nagkanayon nga gikondena ni Presidente Ferdinand Marcos, Jr. ang pagpatay kang Jumalon.

Gimandoan usab sa chief executive ang PNP nga mohimo og makuting imbestigasyon sa maong hitabo ug sigurohon  nga manubag ang naghimo niini.

Ang maong pagpangatake nahitabo sa samang semana sa International Day to End Impunity for Crimes Against Journalists.

Nunot niini, gikondenar usab kagahapon sa grupo sa mga tigbalita sa Sugbo ang linuog nga pagpatay sa radioman.

Ang presidente sa Cebu Accredited Media Practioners (Camp) nga si Nelson Tantano nagkanayon nga ang pagpatay kang Juan "Johnny Walker" Jumalon usa ka insulto sa pagsunod sa nasud sa press freedom. Naglaom siya nga ang pagpatay dili kini lain na usab nga kaso sa wala pa masulbad nga krimen nga naglambigit sa usa ka peryodista sa nasud. — /BDB(BANAT NEWS)