Granada nakuykoyan diha sa gitrabahong drainage

CEBU, Philippines —  Usa ka granada ang nakit-an kagahapon sa buntag diha sa gitrabaho nga drainage sa Tojong Street, Archbishop Reyes Avenue, Barangay Kamputhaw, Dakbayan sa Sugbo.

Matud ni Rodgie Matugas, usa sa mga trabahanbte sa maong drainage project nga nagbalhin sila sa mga yuta nga ilang gikuykoy ug napalgan nila ang maong granada nga porma og atis ug nipahibawo dayon sila sa ilang labaw kinsa maoy nipahibawo usab ngadto sa mga tanod ug ang barangay maoy nitawag sa kapolisan.

Una, nagtuo ang mga trabahante nga dakong bato lang ang ilang napalgan apan naukay sila dihang sa pagsusi niini nahibaw-an nga granada diay kini.

Si Police Master Sergeant Alexander Terado, investigator on case sa Abellana Police Station nagkanayon nga mohimo pa sila og imbestigasyon aron mahibaw-an ang hinungdan nga adunay granada nga nakuykoyan.

Awhag ni Terado sa katawhan nga sa higayon nga aduna sila’y makita nga mga granada o mga mobuto mopalayo dayon sa lugar ug itaho kini ngadto sa kapolisan o hingtungdan nga mga ahensiya nga eksperto sa paghipos niini.

Ang mga personnel sa Explosive Ordnance Disposal nisusi sa maong granada ug gisulod nila kini og galon nga adunay anapog isip pasiuna nga pamagi sa EOD sa paghipos sa granada ug dayon gidala sa ilang buhatan.

Matud ni Police Master Sergeant Joel Taboada, EOD personnel nga ang maong granada MK2 grenade ug kuyaw pa gihapon kini nga mobuto ilabi na kong mainitan.

Pipila sa mga tawo diha sa maong dapit nagtuo nga posibleng ang maong granada gibilin kini diha sa maong dapit dihang kusog pa ang usa sa mga bar diha sa lugar sa nilabay na nga panahon. — BDB (BANATNEWS)