Environmental fees sa mga turista padayong giduso
CEBU, Philippines — Padayon nga giduso ni Lapu-Lapu City Councilor Annabeth Cuizon ang iyang gisugyot nga ordinansahon nga nagtinguha sa pagkolekta og environmental fees sa mobisita nga mga turista sa dakbayan sa Lapu-Lapu.
Sa nasayran ang maong sugyot ni konsehal Cuizon nakasugat og mga negatibong komento gikan sa nanag-iya og hotels ingon man restaurants ug ubang patigayon tungod kay matud pa makadaut kini sa imahen sa siyudad.
Posible nga moresulta kini nga moislag na ang mga turista sa pagbisita sa dakbayan sa Lapu-Lapu.
Hinuon base sa giusab nga proposal ni konsehal Cuizon atol sa miaging regular session nga kolektahon ang P100 nga environmental fees sa mga langyaw nga turista ug P50 sa mga lokal nga turista.
Niadtong Lunes, gipatawag sa konseho sa siyudad sa Lapu-Lapu ang mga nanag-iya og pump boat aron tukion ang maong ordinansahon.
Gihangyo ni Cuizon nga moabag ang mga tag-iya ug operators og pumpboat sa pagpatuman sa maong ordinansa kun ugaling kini maaprobahan.
Lakip sa iyang gisugyot mao ang pagbutang og booth sa dili pa mosakay ang mga turista sa ilang pumpboat aron pagsiguro nga nakabayad og environmental fee ang mga turista pinaagi sa ipakita nila nga ticket.
Sa nasayran tumong sa pagkolekta og environmental fee mao ang paggahin og pundo alang sa environmental management, pagpalambo ingon man pag protihir sa kinaiyahan. (BANAT NEWS)
- Latest
