Tulo sikop sa managlahing buy bust operation sa kapolisan
CEBU, Philippines — Nadakpan sa mga sakop sa City Drug Enforcement Unit (CDEU) sa Lapu-Lapu City Police Office (LCPO) ang usa ka pusher og shabu atol sa ilang buy bust operation.
Si Police Lieutenant Francis Rose Salved sa CDEU sa LCPO miila sa nadakpan nga mao si Gino de Misa, 30 anyos nga taga Lagtang siyudad sa Talisay.
Nasayran gikan sa buhatan sa CDEU nga ilang namonitor ang ilegal nga kalihokan ni de Misa sa maong lugar nga maoy nakaaghat kanila sa pagpahigayon og buy bust operation.
Nasakmit nga ebidensiya ang unom ka gramo nga shabu nga nagkantidad og P6,000.00 ug ang maong dinakpan nalambigit usab sa mga pagpangawat.
Samtang duha ka durugista sa Dakbayan sa Talisay ang nadakpan sa sunod-sunod nga operasyon sa kapolisan niadtong weekend.
Unang operasyon gihimo sa sitio Rattan, Barangay Tanke mga alas 9:37 sa gabii niadtong Sabado.
Ang nasikop mao si Ariel Estoce Engbino, 43 anyos nga taga sitio Tunga, Barangay Tanke.
Nakuhaan siya og shabu nga nitimbang og 4.5 gramos nga adunay gibana-bana nga balor nga P30,600 ka pesos. Mga alas 3:24 sa kadlawon niadtong Dominggo, nasikop si Randy Saquin Bazar, 52 anyos nga taga sitio Magay, Barangay Tanke.
Nasikop siya didto sa sitio Sawsawan, Barangay San Roque sa nahisgutang siyudad.
Nakuha gikan sa dinakpan ang drugas nga nitimbang og 25 gramos nga gibana-bana nga mobalor og P170mil ka pesos ingon man usa ka .45mm pusil nga adunay upat ka buhing bala.
Samtang nasikop nga pusher og shabu sa kapolisan sa Lungsod sa Consolacion ang gipasakaan na og kaso sa korte.
Ang gipasakaan og kaso mao si Teodoro Lauron Jala, alyas Teddy, hingkod ang panuigon nga taga Barangay Tayud sa maong lungsod. — Gabriel C. Bonjoc (BANAT NEWS)
- Latest
