Real state brokers mitiyabaw sa kalangay sa ilang lisensiya

CEBU, Philippines —  Grupo sa real estate brokers  miawhag sa gobiyerno nga paspasan ang pagpagawas sa ilang mga lisensya tungod kay matud pa nila nagkadaghan na ang mga kolurom nga mga real estate sales agents.

Ang Accredited Real Estate Salesperson (ACRES) nakig-alayon sa Department of Human Settlements and Urban Developments aron maaksyonan ang kalangay sa pagpagawas sa mga lisensya sa mga nagtinguha nga real estate sales persons.

Niadtong nakalabay nga Huwebes ang DHSUD-Manila, ACRES uban ang mga real estate group niapil sa consultation meeting uban sa DHSUD may kalabutan sa proposed amendments may kalabutan sa pagpagawas sa maong ahensya sa lisensiya sa mga business firms, brokers ug salespersons.

Lakip sa gituki mao ang proposed revision sa HLURB Board Resolution 922-14 ilabi na kadtong mga apektado sa real estate practice.

Sa pakighinabi kang Anthony Gerard Leuterio ang founder sa A Better Real Estate Philippines, nga usa ka advocacy coalition ug giingong mother organization sa ACRES, usa sa mga isyu nga gituki sa tigum mao ang kabahin sa pagkuha og lisensiya sa mga tawong gustong mamaligya og mga yuta.

Siya mipasangil nga tungod aning kalangay pag release sa mga lisensiya midaghan ang mga kolurom nga ahente.

Sa dili pa makabaligya og real estate properties, ang mga ahente sa yuta kinahanglan mokuha og lisensya sa DHSUD ug Professional Regulatory Commission, ug gikinahanglang nakaapil sila sa online oath-taking.

Sumala pa ni Leuterio ang lisensya dugay kaayong mogawas nga molanat tulo ngadto sa upat ka buwan.  Duna pay mga kaso nga maabtan og walo ka bulan ayha migawas ilang lisensiya.

Gipadayag ni Leuterio kung ingon niini kadugay ang proseso mas mogara ang ubang mga ahente nga dili nalang maniguro paglukat og lisensiya.

Matud niya, ang mga tawong gustong mobaligya sa ilang mga luna dili na mamili kun lisensiyado ba o dili ang ahente, basta ang ilang giapas nga mahalin lang kini dayon ug mohatag nalang sila og komisyon.

Ang ACRES National President Chris Malazarte miingon nga ang open forum usa ka oportunidad nga makapadayag ang mga lehitimong ahente sa yuta   dili lang sa Sugbo apan tibuok Pilipinas bahin aning ilang problema.

Ang ACRES miawhag sa mga ahente og yuta nga duyogan sila sa ilang tumong nga ma-regulate kanang mga nangahente og yuta para sa kaayohan sa tananCEBU, Philippines —  (BANAT NEWS)