Taytayan gitinguha nga ugmaron diha sa Isla sa Olango

CEBU, Philippines —  Gitinguha karon ang kaugmaran sa taytayan sa Isla sa Olango nga maoy magdugtong sa Barangay Pangan-an sa Siyudad sa Lapu-Lapu.

Ang pag-ugmad sa maong taytayan matigayon nunot usab sa lakang nga gihimo ni Kongresista Cindi King-Chan sa Lone Congressional District sa Siyudad sa Lapu-Lapu pinaagi sa paggahin og P60 milyones isip pasiuna sa pag-ugmad sa Phase 1 sa maong proyekto.

Ang maong kantidad tipik lang kini sa P300 milyones nga maoy kinatibuk-ang kantidad alang sa nahisgutang taytayan nga paga-ugmaron diha sa Isla sa Olango.

Ang maong taytayan nga paga-umaron sa Barangay Pangan-an maoy modugtong sa tibuok Isla sa Olango lahos ngadto sa Barangay Sabang sa habagatang bahin niini.

Hinuon subay sa gisugyot nga taytayan nga paga-ugmaron alang lang kini sa mga mag-jogging, maglakaw o magsakay og bisikleta.

Kini gihimo sa paghatag og pasiunang pagtagad sa kalikupan ug kalikayan usab nga matugaw ang mga langyaw nga mga langgam nga motugpa sa bird sanctuary nga nahimutang usab niini. - BDB (BANATNEWS)