Laing Suroy Suroy Sugbo himoon karong Hunyo

CEBU, Philippines — Laing hugna sa mga Suroy Suroy Sugbo ang giandam sa Kapitolyo alang sa tuig 2023.

Human sa Suroy Suroy Sugbo Northern Escapade niadtong bulan sa Enero ug Enchanting Camotes sa bulan sa Abril, duna pay tulo ka leg sa tourism caravan ang ipahigayon karong tuiga.

Sumala sa Provincial Tourism Office, ang sunod nga Suroy-Suroy Sugbo ipahigayon sa bulan sa Hunyo diin adto kini mosuroy sa mga lungsod ug siyudad sa kasadpang bahin sa Probinsya.

Ang “Explore the Midwest” mosuroy sa lungsod sa Aloguinsan, Pinamungajan, Balamban, Tuburan, Asturias ug Tabuelan ug sa siyudad sa Toledo.

Sa bulan sa Septiyembre, ang Suroy Suroy ipahigayon sa mga highly urbanized cities.

Matud ni Maria Lester Ybañez ang Provincial Tourism Officer nga ang Suroy Suroy Sugbo Urban Adventure nahimo na kini kaniadto sa unang mga termino ni Gobernador Gwendolyn Garcia diin ang gisuroy niini mao ang Mandaue ug Cordova.

“And this time we will embrace Lapu-Lapu City and Cebu City” matud ni Ybañez.

Sa bulan sa Nobiyembre, ang tourism caravan adto na pud ipahigayon balik sa mga lungsod sa habagatang bahin sa Probinsya o ang Southern Heritage Trail. Le Phyllis F. Antojado/MEL

SENTO PORSYENTO NA NGA NABALIK ANG TURISMO SA SUGBO

Department of Tourism Secretary Christina Garcia-Frasco, nipadayag nga sento porsyento na nga nahibalik ang domestic travel karong tuiga.

Atol sa iyang pagtambong sa kalihukan sa Kadaugan sa Mactan gipadayag ni Frasco nga prayoridad sa administrasyon ni President Ferdinand ‘Bongbong” Marcos Jr, ang turismo.

Dili lang sa recovery apan apil na usab sa pagpadayon sa mga programa taliwala sa nasugatan nga mga hagit pinaagi sa pagtutuk sa infrastructure, digitalization ug ang paghatag ug kahigayonan sa paglambo pinaagi sa turismo.

Sumala pa ni Frasco, malipayon siya nga nagpabilin nga lig-on ang turismo sa Cebu ug labi na sa Lapu-Lapu City, diin pinaagi sa ilang Kadaugan food Festival, nakahatag kini ug kahigayon sa panginabuhian ug pagpanarbaho.

Gipahibawo usab sa tourism secretary nga ang Sugbo padayon sa pagpangulo sa tourism recovery tungod kay nahatagan kini ug mga pasidungog ug nominado na usab kini sa Asias leading wedding destination.

Nakuha na usab sa Sugbo ang target sa international arrivals sa nilabay nga tuig bisan naa pa karon sa ikaupat nga buwan sa tuig 2023 nga niabot na ngadto sa 1.7milyon.  — MEL ( Banat News )