Managinahan gipamusil sa bayaw, patay

CEBU, Philippines — Patay diha-diha ang manag-inahan samtang kritikal ang usa ka babaye human gipamusil sa nagmaoy nga delivery driver diha sa Barangay San Isidro, Dakbayan sa Talisay niadtong Miyerkules sa gabii.

Ang namatay mao sila si Hilda Fernandez ug si Gilbert Fernandez samtang naangol sab ang pagumangkon niining si Irene Fernandez.

Ang mao si Rogelio Fernandez Jr., 39, igsuon sa bana ni Hilda, kinsa giingong maestro kaniadto sa duha ka eskuylahan sa kolehiyo apan nag-grab driver na.

Si Police Corporal Christopher Lerio, imbestigador sa Talisay City Police nagkanayon nga kalit nga nanghagis ang suspek kay nawagtang ang dumb bell niini.

Wa magdugay nisulod kini sa iyang pinuy-anan ug nagpasalba sa iyang armas nga .38 revolver ug misulod sa panimay sa managinahan ug gipusil si Hilda sa wala nga dughan ug gibuko-buko sab ang sa iyang pag-umangkong si Gilbert.

Gipamusil sila atubangan sa upat ka mga apo ni Hilda nga nag edad og 5 ngadto sa 7 anyos.  Paggawas sa suspek nakita niini si Irene nga nanglaba ug iya sab kini nga gihapit og pusil diha sa buko-buko.

Si Eugene Fernandez, manghud sa suspek miingon nga kulatado gyud sila niini kadtong gagmay pa sila.

Samtang si Honorato Fernandez, maguwang sa suspek nga usa ka OFW miingon nga miinit ang ulo sa igsuon kay sigeg kapildi sa manok. Gusto niya nga mabalhug kini sa bilanggoan tungod sa iyang gibuhat.

Sa pakighinabi sa Banat News sa suspek, siya miingon wala pa niya mabati ang pagbasol apan siya miingon nasayod iyang mga igsuon kun unsa taras sa mga biktima diha sa ilang panimalay.

“Nagpakita naman gyud ko nila kung unsa ang mahitabo kung sige sila og panghilabot. Naputong na gyud ko mao na nga nahitabo,” sigon pa ni Rogelio.

Sa pikas bahin, patay sab ang usa ka 39-anyos nga tigbantay og bar human kini gipusil sa wala mailhing mamumuno sayo sa kaadlawon adlaw nga Huwebes sa may Barangay Calamba sa Dakbayan sa Sugbo.

Ang nakalas mao si Orlando Ordiz, nagpuyo sa may Sitio Sampguita, Barangay Capitol sa maong siyudad.

Ang inahan sa biktima nga si Merly Ordiz nitug-an nga tigduawan sa nahitaboan ang anak kay duna kini amiga nga nagpuyo sa maong dapit.

Wala masayod ang inahan kung kinsay nagpatay ug unsay motibo niini.— Rowena D. Capistrano (BANATNEWS)