Mga niokupar sa 3-meter easement zones sa kasapaan padad-ag notisya

CEBU, Philippines — Magsugod na unya ang Cebu City Government sa tagging ug pag-issue og notisya sa mga  establisamentong dunay mga estrakturang nakaali o nakabalda sa agianan sa tubig sa mga kasapaan sa siyudad partikular kadtong nasulod sa 3-meter easement zones.

Sugdan kini karong adlawa, Miyerkules diin nagkalain-laing team ang mohimo sa tagging operations.

Ang Cebu City Disaster Risk Reduction and Management Council(CCDRRMC) nagpahigayon og meeting sa miaging adlawa uban sa mga barangay officials ug ubang concerned offices aron pag-finalize sa plano sa kalihukan.

“Ang first gyud natong buhaton is ang tagging sa mga structures. At the same time, we will be issuing them notices. The City Legal Office is now finalizing these notices,” sigon ni Atty. Gerry Carillo, Chairman sa Cebu City Disaster Risk Reduction and Management Council (CCDRMC).

Ang activity kabahin sab sa tubag sa gipagawas nga Executive Order No. 2 Series of 2022 nga gititulohang “Gubat sa Baha” nga gi-issue ni Mayor Michael Rama sa miaging semana.

Sigon ni Carillo importante nga i-clear ang three-meter easement zones sa kasapaan kay ang mga tawo nga nagpuyo duol sa sapa mao ra sab ang sige og labay og basurang makaingon sa pagkabara niini.

Sa Guadalupe river ang team langkuban sa Barangay officials gikan sa Sapangdaku, Kalunasan, Calamba, Capitol Site, Guadalupe, Pahina Central, Pahina San Nicolas, Ermita ug Pasil.

Sa Kinalumsan River, ang mga barangay nga apil niini mao ang Buhisan, Labangon, Tisa, Punta Princesa, Mambaling ug Duljo Fatima.

Ang Mahiga river langkuban sa Barangay Talamban, Pulangbato ug Mabolo samtang sa Lahug River mao ang Busay, Kalunasan, Lahug, Kamputhaw, Day-as, Lorega, T. Padilla, Tinago ug Tejero.

Sa Estero de Parian mao ang Kamagayan, Sto. Niño, Tinago, Tejero, San Roque ug Carreta.

Ang Bulacao River langkuban sa Inayawan ug Bulacao ug ang Butuanon river mao ang Budlaan, Binalaw, Bacayan, Talamban ug Pulangbato.

Matud ni Carillo, matag team ubanan sad og representante gikan sa Department of Public Works and Highways (DPWH), Division for the Welfare of the Urban Poor (DWUP), Department of Engineering and Public Works, City Legal Office, City Environmental Sanitation Enforcement Team, Department of Social Welfare and Services, Philippine National Police ug Armed Forces of the Philippines ug uban pa.

Ang maong mga buhatan mo-assist sa tagging teams atol sa operasyon.

Human sa tagging ang barangay officials mag-organizer og public hearing ug konsultasyon sa mga apektadong indibidwal o establisamento.

Ang DPWH ug DWUP maoy mo-verify ug mo-finalize sa tagging sa mga maapektahan ilabi na kadtong mga pamilya aron sila mahatagan og financial assistance  ug ilista isip beneficiaries sa socialized housing projects sa siyudad.

Sigon ni Carillo ang DPWH Central office dunay pundo nga P140 million alang sa three-meter easement clearing operations sa siyudad.— IBM (BANATNEWS)