Mga publikong pansayan sa Tanke ayohon sa kapolisan

CEBU, Philippines — Nagplano ang kapolisan sa Dakbayan sa Talisay sa pag-ayo sa mga pansayan diha sa mga sitio sa Rattan ug Magay, Barangay Tanke.

Kini human nga wala na gyud kini magamit sukad nga naguba sa bagyong Odette.

Nasayran nga natukod ang mga pansayan pinaagi sa paningkamot sa kapolisan sa siyudad ubos sa pakigtambayayon sa negosyante nga si Cyril Velasco, kanhi presidente sa chamber of commerce sa siyudad.

Ilang gihatagan ang mga residente og disyente nga pansayan aron dili na kini bisan asa lang mopahipi aron motubag sa sugo sa lawas.

Si Police Lieutenant Colonel Epraem Paguyod, hepe sa kapolisan sa siyudad nisuroy sa dapit ug gisusi niini ang sitwasyon sa mga pansayan.

Ug nagplano kini sa pag-ayo sa mga pansayan aron kini mapadayon nga mapahimuslan.

Ang gihimo sa kapolisan usa ka programa sa pagpaduol sa komunidad ug pag-abag sa ilang gikinahanglan. BDB BANAT NEWS