P8.1 milyon nga shabu nakuha gikan sa electrician
CEBU, Philippines — Moabot sa P8.1 milyones nga kantidad sa shabu ang nakuha gikan sa usa ka electrician sa buy bust operation diha sa Sitio San Rafael, Barangay Tanke, Dakbayan sa Talisay kagahapon sa alas 4:35 sa kaadlawon.
Ang dinakpan mao si Joey Trocio Gabrillo, 29, taga Urban Loor, Barangay Maghaway sa nahisgutang siyudad.
Si Police Lt. Col. Epream Paguyod, hepe sa kapolisan sa Talisay nibutyag nga usa ka semanang gipanid-an ang lihok ni Gabrillo hangtud nga natigayon gyud ang operasyon.
Matud pa niya nga gihimo nga bodegero ang dinakpan nga ila na karon nga nailhan nga High Value Individual (HVI).
Sa operasyon, wa na makapalag pa ang dinakpan nga nakuhaan og drugas nga nitimbang og 1,200 gramos nga adunay gibana-bana nga balor nga P8,160,000.
Nahibaw-an nga si Gabrillo makabaligya sa shabu og dinaghan ilabi na nga sa Talisay ug Minglanilla ang iyang operasyon. IBM BANAT NEWS
- Latest