Pag-serve sa suspension nilang Rama napakyas

CEBU, Philippines — Human sa pipila ka pagsuway pag serve sa unom ka buwan nga preventive suspension batok kang Cebu City Mayor Michael Rama ug laing pito ka mga opisyal napakyas ang Department of Interior and Local Government (DILG)-7 sa pagpatuman sa suspensiyon human walay opisyal nga mitumaw aron pagdawat sa notice kagahapon adlaw nga Biyernes, Mayo 10, 2024.

Mga 11:30 A.M. kagahapong adlawa, miabot ang grupo sa DILG-7 nga gipangulohan ni DILG-7 Regional Director, Leocadio Trovela sa Cebu City Hall diin ang tuyo mao ang pagsilbi sa unom ka buwan nga preventive suspension decision sa Office of The Ombudsman batok kang Rama ug pito pa ka mga opisyal sa city hall.

Apan walay personnel sa Office of the Mayor nga makadawat sa suspension order, si Trovela ug ang iyang team, nibalhin ngadto sa buhatan ni City Administrator Attorney Collin Rosell kinsa usa sa mga respondents, sa pagdahum nga dunay personnel nga makadawat sa order gikan didto.

Ang mga empleyado nga gihangyo nga padawaton sa pahibalo miingon sa grupo sa DILG kauban ang media nga dili sila ang tukmang tawo nga mudawat niini.

Tungod niini, gipaskin nalang sa DILG-7 ang notice sa pultahan sa City Assessors Office mga alas 12:40 sa udto.

Ang notice para kini nila ni Maria Theresa Rosell, Cebu City Assessor ug Francis May Jacaban, Designated Assistant Department Head.

Sa pakighinabi sa media, gipasabot ni Trovela nga dili pa makonsiderar nga suspendido sila tungod kay wala pa kini ma-serve sa alas-2 sa hapon.

 Si Trovela niingon nga ang notisyang gipaskin magsilbi lang kini nga notice sa suspension ug dili ang aktuwal nga pagpatuman sa suspension. Ang notisya nag-ingon: “In Considering that said Order is immediately executory, you are hereby directed to cause the immediate implementation of the aforesaid Ombudsman Order upon respondents Michael L. Rama, Collin E. Rosell, Maria Theresa C. Rosell, Francis May L. Jacaban, Angelique B. Cabugao, Jay-Ar B. Pescante, Lester Joey O. Beniga, Nelyn P. Sanrojo.”

Ang kamandoan penetsahan og Mayo 8,2024 ug nadawat sa buhatan sa DILG -7 niadtong Mayo 9, 2024 gikan kang Atty. Juan Victor R. Llamas, Undersecretary for External, Legal and Legislative Affairs.

“The intention is to serve it personally kay pumunta kami sa office. Babalik and i-exhaust namin lahat para ma receive ang notice personally,” matud pa ni Trovela.

Apan si Trovela miingon nga adunay uban pa nga  mga paagi usa niini sa usa ka registered mail.

Sa dihang gipangutana kun duna na bay nasuspenso sa mga respondents, igo lang nitubag si Trovela, “No one.” IBM BANAT NEWS