5-anyos gilumsan sa maguwang

CEBU, Philippines — Usa ka masulob-on ug makasakit sa dughan nga sitwasyon ang nasinati karon sa usa ka pamilya sa Sitio Lawis, barangay Suba-Basbas sa Dakbayan sa Lapu-Lapu human ang ilang 5 anyos nga anak nga lalake ang gihapsan og bato sa ulo unya gilumsan hangtud nakabsan sa kinabuhi kagahpon sa alas-9 sa buntag, Mayo 10,2024.

Ang naghimo sa krimen, ang iyaha rang iyang igsuong lalaki sa inahan nga nag-edad og 14 -anyos.

Ang insidente nahitabo daplin sa dagat samtang nangaligo ang biktima ug ang 14-anyos.

Sigon ni Police Lieutenant Colonel Christian Torres, Public Information Officer sa Lapu-Lapu City Police Office (LLCPO) ang biktima ug ang 14-anyos nga batang lalake managsuon sa inahan apan lahi og mga amahan.

Ang matud pa krimen nasaksihan lain pud nilang iguson nga 7-anyos kinsa mitug-an sa kapolisan nga gihapak sa ilang maguwang og bato ang ulo sa ilang manghod ug pagkahuman gilumsan kini.

Matud pa ni Torres, nabuhat kini sa 14-anyos nga maguwang  tungod sa iyang  kalagot ngadto sa ama-ama nga amahan sa biktima kay gisegihan siya niini kasaba ug palayason tungod sa iyang pagkabadlungon sab.

"Nasuko ‘tong iyahang gikapuyo sa iyang Mama ‘ron which is ang kanang Papa sa namatay. Ang kanang bata kay pirmi siya daug-daugon siguro nag-abot na iyahang kalagot mao ‘to ang gipahimungtan katong iyang manghod nga 5 years old," sigon ni Torres.

Ala-una na sa udto na-report sa kapulisan ang nahitabo sa bata sa dihang nadala sa tambalanan ang patay'ng lawas sa bata. Ang inahan sa mga bata ang nag report niini pagkasayod nga gituyoan pagpatay ang iyang anak.

"Nagtuo sila nga pure lang nalumos mao ‘to naka estorya ‘tong usa ka igsuon, nakakita siya sa hitabo nga gibunalan og bato ang ulo, naa may samad ang bata gud sa nawong, gihapsan og bato sa ulo then mao ‘to nakakita sad ang bata nga gilumsan gyud niya og tuyo ang iyang manghod," ni Torres pa.

Gitugyan sa DSWD ang 14-anyos nga bata ug alang sa intervention.

Susihon sab sa kapulisan kung wala nagbisyo ang maong 14-anyos nga bata.  IBM BANAT NEWS