Mga vendor sa Carbon nisuporta sa programa sa Cebu City

CEBU, Philippines — Gitataw sa Cebu City Market Authority nga nihatag ra og kooperasyon ang mga vendor sa Carbon sa mga programa sa siyudad.

Pipila sa gisuportahan sa mga vendor mao ang Carbon Market Joint Venture Agreement (JVA) ubos sa kagamhanan ug Megawide Construction Corp..

Gibutyag ni Market Administrator Raquel Arce nga adunay bukas nga komunikasyon ang ilang buhatan alang sa vendors.

Gani usa sa senaryo nga gihangop sa vendors ang kabag-ohan sa Carbon mao ang kalamposan sa Sunday Market.

Nasayran nga nagkadaghan og samot ang nibisita sa Carbon tungod sa kasadya niini ug  tungod sa paghangop sa publiko gidugangan og mga adlaw ang nasugdan na nga "Sunday Market" diha sa Carbon.

Gikan sa matag Dominggo sa gabii nga operasyon niini gipuno ang Biyernes ug Sabado sa alas 4:00 sa hapon hangtud sa alas 10:00 sa gabii.

Giingong naghatag kini og lapad nga oportunidad sa market vendors nga makapamaligya sa ilang mga pagkaon, produkto, delicacies sa Sugbo ug uban pa.

Nahimutang ang stalls niini diha sa Quezon Boulevard sa Carbon Area.

Aduna usab kini imbitado nga mga banda hinungdan nga nag-aghat usab kini og daghang kustomer sa Carbon. —BDB (BANAT NEWS)