Target bakunahan sa Cebu City wala makab-ot

CEBU, Philippines — Wala makab-ot sa Cebu City Health Department ang target niini nga 58 mil ka tawo sa tulo ka adlaw nga ikatulong National Vaccination Days nga gipasiugdahan sa gobiyerno niadtong Pebrero 10 hangtud niadtong adlaw nga Lunes.

Sumala pa ni Dr. Jeffrey Ibones, OIC sa CCHD kapin pa sa 30 mil ang nagpabakuna ug nagpa-booster shots. Apan gilugwayan kini karon sa DOH hangtod sa Pebrero  18.

Nagtuo si Ibones nga gamay ra ang nagpabakuna karon tungod kadaghanan sa mga residente sa siyudad bakunado naman samtang namili sab og brand ang mga nagpa-booster shots. Hinuon tungod sa lugway, malaumon si Ibones nga makab-ot nila ang target.  Karong adlawa sugdan sa siyudad ang vaccination sa 5- 11 anyos, alas 8 sa buntag una nilang ablihan ang vaccination site sa gym sa Cebu City Sports Center ug sa alas-10 sa buntag adto sa Ayala Center Cebu.  Moabot 400 ka mga bata ang target nga bakunahan kada adlaw. Subling giklaro ni Ibones nga walay walk-ins ug ang iakomodar kadto lang mga nakadawat og text message gikan sa Cebu City Government aron malikayan nga magpunsisok ang mga bata sa vaccination sites. Sa pikas bahin, ang Dakbayan sa Lapu-lapu nagtinguhang makabakuna og 60 mil ka mga batang nagpanuigon og 5- 11 anyos sumala pang Dr.  Agnes Realiza, pangulo sa City Health Office (CHO). Apan pagkakaron kapin singko mil pa ang nagparehistro sa maong mga edad. Si Mary Grace Chan - Catunggay, City Epidemiological and Surveillance Unit (CESU) officer miingon nga sa covered gymnasium sa Lapu-Lapu City Central School ang pagmakuna sa mga bata.— Romeo Limpangog/IBM (BANATNEWS)