Mga mosulod sa merkado sa Cebu City na-edukar na

CEBU, Philippines — Gibutyag sa hepe sa Cebu City Market Operations Division Irvin Cabales nga na-edukar na gyud ang kasagarang mga tawo nga mosulod sa merkado ilabi na sa istriktong polisiya sa pagsul-ob og face mask.

Nasayran nga sa niaging mga buwan gatosan ang natala nga violators matag adlaw apan karon aduna na lang kini average nga usa ngadto sa tulo ka violators matag adlaw.

Gikan sa buwan sa Enero niining tuiga kapin na sa 3,000 ang nadakpan sulod sa nagkadaiyang kamerkadohan gumikan sa kapakyas sa pagsul-ob og face mask.

Nasayran nga gawas sa mga personnel sa MOD lakip nga nag-roving sa mga kamerkadohan sa siyudad ang mga sakop sa Task Force Kasaligan.

Sa unang quarter karong tuiga nag-apod-apod ang MOD og mga libreng face mask alang sa mga mangomprahay sa merkado.

Gawas sa community service nga gipahamtang nga silot sa violators gipaubos usab nila kini og seminar kalabot sa importansiya sa pagtuman sa health protocols isip usa sa mga pamaagi nga dili mataptan sa COVID-19. (Sanden J. Anadia/BDB)

155 ka establisamento sa Cebu City nakalapas sa protocols

Niabot ngadto sa 155 ka establisamento sa Dakbayan sa Sugbo ang giingong nakahimo og kalapasan base sa datos sa Emergency Operations Center (EOC) Cebu City.

Gikan sa Hunyo 25 hangtud sa 27 niabot ngadto sa 814 ka establisamento sa siyudad and nabisita sa EOC diin 155 niini ang nakahimo og kalapasan ug 12 ang naisyuhan og show cause order sa Business Permit and Licensing Office.

Ang EOC uban sa kapolisan ug ubang departamento sa Cebu City Hall ang hugot nga nag-monitor sa mga establisamento ilabi na sa resto bars pagsiguro nga nituman sila sa basic health protocols sama sa pagsul-ob og facemask ug pag-obserbar sa social distancing.

Kini aron malikayan ang pagsaka og balik sa kaso sa COVID-19 sa siyudad.

Gani niadtong Biyernes sa gabii nikuyog si acting Cebu City Mayor Michael Rama ug si Inter-Agency Task Force-Management of Emerging Infectious Disease(IATF-MEID) deputy chief implementer Retired General Mel Felicano sa mga personnel sa EOC sa pagpahigayon og inspeksiyon sa mga establisamento.

Samtang si Cebu City Mayor Edgardo Labella bisan og naka-leave of absence padayon usab kining nag-monitor sa sitwasyon sa Cebu City aron masiguro nga dili mosaka ang kaso sa COVID-19 sa siyudad.

Ang kagamhanan sa siyudad padayon nga nagpahinumdom sa katawhan nga motuman gyud sa basic health protocols aron malikay sa maong virus.

Nanghangyo usab sila sa publiko nga ugaling adunay mabantayan nga establisamento nga wala motuman sa gipagawas nga guidelines isumbong kini ngadto sa Emergency Operations Center Task Force pinaagi sa pagtawag sa ilang numbero nga 0947 486 1655 ingon man sa landline number nga 411-0100 local 614 pwede usab mopadala og mensahe diha sa ilang facebook page. BDB (BANATNEWS)