Duha patay sa managlahing pagpamusil

CEBU, Philippines — Gipusil patay ang usa ka drayber og E-bike sa duha ka mamumuno didto sa Barangay Cansojong, Dakbayan sa Talisay niadtong Huwebes sa hapon.

Ang biktima mao si Albert Hermosisima, 27 anyos nga taga sitio Tunga, Barangay Tanke sa nahisgutang Siyudad.

Si Patrolman Eleazar Belciña sa Talisay City Police Station niingon nga namasahero ang biktima nga gisundan sa nagsakay og motor dayon gipusil makausa ka higayon ug dali usab nga nakasibat ang mga mamumuno.

Wa na matabang ang biktima human naigo sa iyang ulo.

Na-rekober sa kapulisan sa crime scene ang usa ka kabhang sa .45 nga bala.

Ang asawa sa namatay nitug-an sa mga otoridad nga adunay nakalalis ang iyang bana niadtong miaging semana ug siya gibaharan.

Gitug-an ni Eleazar nga mao kini ang una nilang gisundan nga anggulo samtang ila usab gisubay ang background sa biktima.

Samtang patay usab ang 20 anyos nga lalaki human kini gipusil sa riding in tandem niadtong Biyernes sa kadlawon diha saPurok 4, Barangay Tugbongan, Lungsod sa Consolacion.

Si Police Staff Sergeant Romero Batulan sa Consolacion Police Station miila sa biktima nga si Kylle Clifford Soon nga nagpuyo usab sa maong dapit.

Matud pa ni Batulan nga naglakaw ang biktima pauli sa ilang panimalay dihang kalit lang gibabagan og motorsiklo nga giluwanan og duha ka wala mailhing mga lalaki.

Ang angkas sa mibabag nga motorsiklo kalit lang namusil kang Soon sa makadaghang higayon nga maoy hinungdan sa iyang hinanali nga kamatayon.

Si Batulan miingon nga nagpadayon pa ang ilang imbestigasyon sa maong pagpamusil. Romeo Limpangog/MEL (BANATNEWS)