15 ka tawo nga nagtigbakay sikop

CEBU, Philippines — Nikabat  ngadto sa 15 ka tawo ang nagtingkagol sa detention cell sa kapolisan sa Dakbayan sa Lapu-Lapu human sila nasikop atol sa operasyon nga gipahigayon sa mga polis tungod kay nagpahigayon ug sabong diha sa Sitio Tungdon, Barangay Basak, Dakbayan sa Lapu-lapu niadtong Sabado.

Matud ni Police Colonel Clarito Baja, hepe sa Lapu-lapu City Police Office nga nakadawat sila og report gikan sa concern citizens kabahin sa gipahigayong tigbakay diha sa ilang lugar.

Human nakadawat og report, ang kapolisan sa Police Station 4 nagpahigayon dayon og patrolya diha sa lugar hinungdan nga nasikop ang mga nitan-aw ug nipusta sa tigbakay.

Si Baja nagkanayon nga ang pagkasikop sa mga tawo nga diha sa tigbakayan nagpahinumdum kini sa katawhan nga magpabilin sa ilang balay samtang gipaubos pa ang dakbayan sa general community quarantine (GCQ).

Ang kapolisan nag-andam na pagsang-at og tukmang kaso batok sa mga suspetsado. /BDB (BANATNEWS)