Duha ka sitio sa Mambaling dunay hinabang
CEBU, Philippines — Ang Archdiocese of Cebu uban ang Cebu Caritas Inc. ug Commission on the Laity niapod-apod na usab og hinabang diha sa duha ka sitio sa Barangay Mambaling nga naapektahan sa covid-19 pandemic.
Kagahapon sa buntag nangulo sa pag-apod-apod sa tabang mao ang chairman sa Cebu Caritas Inc. Padre Alex Cola Jr. nga gipahigayon diha sa gym sa barangay.
Matud ni Cola nga ang maong hinabang alang sa kini sa Sitio Tinabangay ug Sitio Alaska Centro.
Gibutyag ni Cola nga 275 ngadto sa 300 ka pamilya sa Tinabangay ug 180 ngadto sa 200 ka pamilya sa Alaska Centro ang gihatagan og hinabang.
Ang sulod sa food packs nga gidunol gilangkuban sa tulo ka kilong bugas, tulo ka latang sardinas, tulo ka latang beef loaf ug duha ka sabon.
Dugang ni Cola nga padayon gihapon sila sa pagpanawat og donasyon sa buot mopaambit sa ilang grasya tungod kay daghan pa silang mga apektado nga lugar ang hatagan og ayuda. /BDB (BANATNEWS)
- Latest
