Dugang ayuda gitinguha ni Ahong

CEBU, Philippines — Gitinguha ni Lapu-Lapu City Mayor Junard “Ahong” Chan ang dugang mga kabus nga Oponganon nga kahatagan sa Social Amelioration Card (SAC) hinungdan sa iyang hangyo sa nasudnong kagamhanan.

Giawhag usab niya ang mga Oponganon nga kalma lang ug dili mag-emosyonal bahin sa maong ayuda.

Ang dakbayan gigahinanan lang og 48,000 ka SAC alang sa mga kwalipikado nga households samtang mokabat sa 500,000 ka households ang nanginahanglan sa tabang.

Wala pa kadawat si Chan og tubag labot sa iyang hangyo sa nasudnong kagamhanan.

“Sa among eksperyensiya sa pag-distribute namo og bugas, mag-away pa man gani,” matud ni Chan.

Ang porma sa SAC dunay ipauban nga dokumento sa hingtungdan nga household ug sutaton pa kini sa Department of Social Welfare and Development kung kwalipikado ba sa programa.

Usa sa basehan nga ang usa ka household dunay kinitaan nga dili mosobra sa P10,000 matag buwan.

“Akong giawhag ang tanan nga isumbong ang natagaan nga dili qualified ug kinsa ang qualified pero wala mahatagi,” dugang ni Chan.

Usa ka sako

Samtang makdawat og 40 kilos nga bugas ang mga molupyo sa 11 ka barangay sa Isla sa Olango samtang nagpadayon ang Enhanced Community Quarantine sa dakbayan.

Si Chan niingon nga ang 40 kilos nga bugas maoy pagkompleto sa usa ka sako nga bali og 50 kilos.

Una na nga nakadawat ang mga molupyo sa Isla sa Olango og 10 ka kilos sa niaging buwan.

Gipasabot ni Chan nga apektado sa krisis ang mga molupyo sa kabarangayan sa isla nga ang kadaghanan sa ilang panginabuhi nalambigit sa turismo.  Gawas sa bugas nga gihatag sa City Social Welfare and Development, nalakip usab niini ang mga de lata nga pagkaon nga gipanghatag sa matag pamilya.

Sa laing bahin gipatuman ni Chan ang higpit nga pagbantay sa kapolisan sa Sitio Masiwa, Barangay Marigondon diin nagpuyo ang ikaupat nga nagpositibo sa COVID-19.

Gipatuman ang lockdown sa maong lugar sa tuyo nga ang mga molupyo gidid-an sa paggawas sa ilang panimalay. /GMR (BANATNEWS)