Ilegal nga istruktura sa Sambag 2 hawanan

CEBU, Philippines — Niluwat ang City Legal Office (CLO) og clearing order sa mga ilegal nga istruktura sa Barangay Sambag 2, Siyudad sa Sugbo.

Si City Legal Officer, Atty. Rey Gealon, niingon nga ang Prevention, Restoration, Order, Beautification, Enhancement (PROBE) nagpahigayon og inspeksyon sa lugar nunot sa reklamo ni Barangay Kapitan Ryan Aznar.

Base sa report sa PROBE nahibaw-an nga adunay mga ilegal nga istruktura nga gigamit nga puy-anan ug mga tindahan sa mga nag-okupar niini sulod sa usa ka pangpublikong kadalanan ilabina sa M. Oyson Street, M.H. Aznar Road, J. Urgello Street ug Aznar Road sa Barangay Sambag 2.

Matud ni Gelaon nga subay sa DILG Memorandum No. 2019-121 ug City Ordinance No. 1481, walay babag sa pag-isyu sa maong clearing order.

Ang DILG nimando sa mga gobernador, mayor, punong barangay ug uban pa sa paghawan sa kadalanan aron magamit sa mga tawo. /GMR (BANATNEWS)