SITG sa Ramirez-slay dili na padayonon

CEBU, Philippines — Special Investigation Task Group sa kaso ni kanhi Medellin mayor ug incumbent councilor Ricardo ‘Ricky’ Ramirez dili na padayunon sa Police Regional Office-7 kay wala makapasar sa ilang criteria matud ni PRO-7 director Police Brigadier General Debold Sinas.

Apan dili gihapon hunongon ang imbestigasyon sa maong kaso kay ang Medellin police na maoy mangunay sa pag-imbestiga sa maong kaso. Ang tigpamaba sa Cebu Provincial Police Office nga si Police Lieutenant Colonel Eloveo Marquez maoy unang mianunsyo nga adunay giumol nga SITG sa maong kaso, apan giklaro ni Sinas nga kinahanglan pa nila kining tan-awon kun nakapasar ba sa tulo ka criteria.

Una, kinahanglang empleyado kini sa gobyerno; ikaduha, membro sa Armed Forces of the Philippines o sa Philippine National Police; ug ikatulo giingong kun makaapektar sa peace and order sa lugar ang pagpatay kaniya.

“Sa iyaha kasi inmate siya, if naa pa siya sulod sa prisohan di unta to mahitabo sa iyaha,” sigun ni Sinas. Sumala pang Sinas, gawas sa kalambigitan sa illegal nga drugas gitan-aw sab nila karon ang posibilidad nga gibaslan si Ramirez sa mga paryente sa gipamusil niya kaniadto ug uban pang nasilo niya.

Si Ramirez, 55, na-hospital arrest sa Bogo-Medellin Corporation Medical Central human siya madakpi sa CPPO-Provincial Intelligence Branch niadtong Hulyo 26, 2017 pinasikad sa search warrant sa kasong paghupot og illegal nga mga armas.

Niadtong Hunyo 19 karong tuiga, giransak sa gibana-banang 15 ka mga armadong grupo ang maong tambalanan ug gipatay si Ramirez.

Kagahapong adlawa gihatud sa mga kabanay si Ramirez sa Queen City Memorial Garden sa Dakbayan sa Sugbo.

Mihangyo ang pamilya nga himuong pribado ang maong lubong ug gidid-an ang mga sakop sa media pagkuha og hulagway o video sa ilang pagbangutan.

Ang sinaligan ni Ramirez nga si Medellin Planning Officer Giles Villamor, niawhag sa publiko nga respetohan ang hangyo sa pamilya nga hatagan sila og pribasiya apan mopagawas unya sila og opisyal nga pamahayag sa umaabot nga mga adlaw. (BANAT NEWS)