Driver gidunggab sa kainom

CEBU, Philippines — Giluba sa iyang kauban sa inom ang usa ka truck driver dihang mag-iyahay na unta sila og buwag-buwag human sa ilang inom.

Ang insidente nahitabo sa may gas station sa M.J. Cuenco Avenue, Villagonzalo I, Barangay Tejero, Dakbayan sa Sugbo niadtong Miyerkules sa gabii.

Ang biktima mao si Michael Martinez, 34, driver ug stay-in worker, samtang ang suspek mao si Japit Bohol, ulitawo, kauban sa biktima ug lumad nga taga Dakbayan sa Toledo ug temporaryo nagpuyo sa maong lugar. Base sa inisyal nga imbestigasyon nga nag-inom ang biktima ug suspek.

Dihang padulong na molakaw si Martinez, nasuko si Bohol hinungdan nga nikuha kini sa iyang kutsilyo dayun dunggab ngadto sa walang bahin sa lawas sa biktima. Human sa pagpanunggab ni Bohol ngadto sa biktima, dali kining nakasibat.

Matud ni Police Senior Master Sergeant Edario Manatad, imbestigador sa maong kaso, nga si Martinez dali ra sab nga gidala sa iyang mga kauban sa tambalan tungod sa mga samad dinunggaban nga naangkon.

Personal nga bangi ang gitan-aw sa kapolisan nga motibo sa pagpanunggab sa suspek ngadto sa biktima. (Rose Carmel De la Cerna, CNU Intern/GMR)  (BANAT NEWS)