Bag-ong DEU operatives giandam

CEBU, Philippines — Mga mopuli sa gipangrelibohang mga miyembro sa Drug Enforcement Unit sa Cebu City Police Office kumpleto na.

Ang direktor sa Cebu City Police Office, Police Colonel Royina Garma nagkanayon nga moabot sa kapin 60 ka mga operatiba ang ipaubos og pagbansaybansay ug seminar sa Philippine Drug Enforcement Agency-7 (PDEA) karong Hunyo 18.

Lakip na sa 60 ang mga station commanders nga maoy magsilbi na unyang team leader sa mga DEU units.

Gibutyag ni Garma nga ang mga station commanders maoy mirekomendar sa mga operatiba ug ang mga kadagkuan sa CCPO maoy namili kanila.

Dihang nakumpleto na sila, gipaubos dayon sila og drugtest ug background check aron masuta kon aduna ba silay kalambigitan sa ilegal nga duogas ingon man ang mga paryente niini.

Gitug-an ni Garma nga dilil basta-basta ang ilang gipamili sanglit adunay silay mga standard nga gisubay.

Una niini mao nga kinahanglang walay derogatory records ug kon desidido ba kini sa trabaho.

“Third, may mga tinitingnan kasi kami na mga character, mga personality nila na ma-fit as operatiba. And then yung (may) training, like may investigation or may intelligence (training) kahit basic training or seminar na inattend ng operatiba, so yun yung tinitingnan nating mga qualification,´ dugang ni Garma.

Tag upat ka mga operatiba ang ibutang nila matag estasyonan samtang unom ang ibutang sa City Drug Enforcement Unit diha sa ilang headquarters.

Naglaum ang director nga unta mohimo sa ilang trabaho ang mga bag-ong operatiba ug ilang nakat-onan ang mga sayop nga nahimo sa ilang gipamulihan.

Kahinumduman nga si Police Corporal Rogelio Atillo, usa ka operatiba sa DEU sa Labangon Police Station, ang nadakpan sa buybust human kini gitumbok nga maoy tinubdan og ginadiling drugas sa dinakpan sa Pardo Police Station.

Subay niini, Si Garma nakadesisyon nga regular ang assessment ug evaluation sa mga operatiba aron nga mamonitor kini og tarong. (DILT) (BANAT NEWS)