6 nadakpan sa managlahing anti-drug operation
CEBU, Philippines — Unom ka durugista ang nasikop samtang usa ang nakasibat sa gihimong managlahing operasyon kontra drugas sa kapolisan sa Siyudad sa Talisay sud lang sa usa ka adlaw.
Nagsugod ang operasyon alas 4 sa hapon niadtong Huwebes sa Sitio Sawsawan, Brgy. San Roque, apan gidemalas ang kapolisan kay nakasibat ang ilang dakponon nga si Justine Mabala, hingkud ang panuigon nga taga Brgy. Tanke kinsa nagbilin og gituohang shabu nga mobalor og P87, 040.
Sa laing operasyon, mga alas 4:30, nasikop si Ramil Amagos, 28-anyos kinsa nakuhaan og upat ka gagmayng pakete sa gituohang shabu ug si Niño Reyes, 42-anyos nga nakuhaan og usa ka medium nga pakite sa gituohang shabu.
Pagka alas 5 sa hapon nadakpan sab si Dina Reyes, 41-anyos sa Sitio Rattan, Brgy. Tanke ug nakuhaan kini og 16 ka gagmayng pakite sa gidudahang shabu.
Human sa pipila ka oras nga pahuway, mibalik sa ilang operasyon ang Talisay City Police mga alas 11 sa gabii diin ilang nasikop ang managsuon ug ang higala niini nga nakuhaan og mga marijuana sa Brgy. Dumlog.
Ang mga nadakpan mao sila si Kent Marvin Cabusas alyas Aplik, 28-anyos; Noel Cabusas, 23-anyos ug si Joenard Belleza, 38-anyos, lumad nga taga Surigao.
Nakuha gikan kanila ang mga pinauga ug liso sa marijuana nga mitimbang og 1.5 gramos nga mobalor P180 mil.
Ang mga dinakpan anaa na karon sa bilangguan ug gikatakdang pasakaan og kaso. (/DILT)(BANATNEWS)
- Latest
