Hugpong ng Pagbabago sa Cebu

CEBU, Philippines – Nahugyaw ang mga Mandauehanon dihang gipaila si presidential daughter, Davao City Mayor Sarah Duterte nga mosunod nga presidente sa nasud sa tuig 2022.

Si Mayor Luigi Quisumbing maoy mihingan kang Mayor Duterte niini  atol sa gihimo nga campaign caravan sa Hugpong ng Pagbabago (HNP) nga gipahigayon sa Mandaue City Cultural and Sports Complex kagahapon.

Padayon ang paninguha sa HNP nga gipanguluhan ni Mayor Sara nga makakuha og suporta ug boto gikan sa mga Sugbuanon.

Si Duterte unang mibisita sa Mandaue City aron iyang ikampanya ang 13 ka mga senador sa ilang slate, kini bisan pa man nga 12 lang ang pili-on isip pagka senador.

Matud ni Duterte nga iyang gipili ang maong mga kandidato pagka senador basi sa ilang track record, plataporma ug suporta ngadto sa administrasyon sa iyang amahan.

Ang 13-member slate gilangkuban kini sa mga Senate reelectionists ug returnees nga sila Cynthia Villar, Sonny Angara, JV Ejercito, Koko Pimentel, Bong Revilla, Pia Cayetano ug Jinggoy Estrada.

Inubanan nila ni kanhi Philippine National Police director Ronald dela Rosa, kanhi Special Assistant to the President Bong Go, Rep. Zajid Mangudadatu (Maguindanao), kanhi reporter Jiggy Manicad ug kanhi MMDA chairman Francis Tolentino ug Ilocos Norte Governor Imee Marcos.

Apan ang nitunga lang sa maong caravan rally mao lang sila Dela Rosa, Marcos, Estrada, Manicad ug Tolentino. Si Go, girepresentahan kini sa singer nga si Bayani Agbayani samtang si Angara girepresentahan kini sa iyang asawa nga si Tootsy.

Matud pa sa asawa ni Angara nga ang iyang bana dili lang maalam  apan usa usab kini ka kugihan nga lawmaker ug maayong family man.

Si Marcos mibatbat pud sa iyang plataporma nga “KKK” nga pasabot og Kaon, Kumyut ug Kumunikasyon nga buot nga unta magpabilin nga ubos ang presyo niini.

Si Manicad namahayag sa iyang plataporma nga food and security samtang si Dela Rosa padayon sa pag-awhag sa matag pamilya nga layuan gyud ang ilegal nga drugas aron kita makabaton og kalinaw ug seguridad.

Si Estrada, kinsa bag-o lang nakagawas sa prisohan tungod sa pasangil og plunder, mipasabot sa katawhan nga wala siyay sala sa katawhang Pilipino ug si Tolentino buot nga maghimo og Philippine Urban Development Commission kay alang niya adunay mga “national problems with local solutions”.

Ang mga lokal nga kandidato sa Hugpong Mandauehanon sa Pagbabago nga gipanguluhan ni Mandaue City Mayor Luigi Quisumbing ug Vice Mayor Carlo Fortuna inubanan sa ilang mga kandidato sa pagka konsehal midiskurso usab sa ilang mga plataporma ngadto kapin dies mil ka katawhan nga nanambong sa maong rally.

Samtang ang One Cebu party nga gipangulohan ni Third District Representative Gwendolyn Garcia ang gikatakda usab nga mopalig-on sa ilang pagpakig-alyado sa HNP pinaagi sa pagpirma og kasabutan nga himuon sa Lungsod sa Liloan karong adlawa.

Ang panag-alyado sa duha ka partido maoy pagpalig-on sa mga kandidato nga ubos niini nga naglakip sa giindosar nga kandidato sa pagkasenador sa HNP ug ingon man ang mga kandidato sa One Cebu sa 44 ka mga lungsod ug walo ka mga dakbayan sa Lalawigan sa Sugbo sa pagsiguro sa kadaugan niini.

Si Mayor  Duterte kauban sa  HNP senatoriables mopahigayon sab sa ilang pagpangampanya sa Lungsod sa Liloan, Dakbayan sa Danao ngadto na sa tanang dapit sa lalawigan. (Romeo T. Limpangog/DILT)(BANAT NEWS)