Gihulga atol sa demolisyon

CEBU, Philippines – Daku ang pagtuo sa pangulo sa Prevention, Restoration, Order, Beautification and Enhancement (PROBE) Raquel Arce nga may kalabutan sa trabaho ni Arnulfo Cadungog ang nahitabo kaniya.

Si Cadungog gipusil sa may M.J Cuenco Avenue, Brgy. Tejero, Siyudad sa Sugbo sa wala pa mailhing mamumuno niadtong Huwebes sa hapon.

Matud ni Arce nga ang nahitabo gumikan sa gihimong clearing operation sa Arellano Boulevard, Sitio Silangan II sa naasoy nga barangay niadtong miaging adlaw. Giingong adunay usa ka tawo ang nag-megaphone ug mibahad sa PROBE Team.

“Yes, vocally gisulti na through megaphone nga kung ipadayon namo ang clearing operation naa gyud sila’y kuhaon sa among team. Si Anul naa nagpuyo sa Tejero, between sa akoang miyembro sa PROBE team, duha lang na sila nga naa anang dapita…”, matud ni Arce. Apan ang taga Sitio Silangan hugot nga mihimakak nga sila maoy nagpaluyo sa suway nga pagpatay kang Cadungog.

Ang abogado sa among mga residente nga si Atty. Vincent Isles miingon nga dili makiangyon nga ipahid ngadto sa iyang mga kliyente ang pagduda nga sila maoy suway nga mipatay kang Cadungog.

Dugang ni Atty. Isles walay direktang partisipasyon si Cadungog sa demolisyon sanglit igo raman siyang ga-supervise ug walay rason nga masuko kaniya ang mga residente. Matud ni Isles nga dili mabuhat sa iyang mga kliyente ang maong krimen kay gani pormal man silang midangop sa korte aron mapahunong ug mababagan ang demolisyon sa ilang dapit.

“He was the team leader, nagtan-aw ra man siya as team leader. So nganong siya may initan kung tinuod man gani nga ang iyang gihimo didto maoy hinungdan nga giingon ana siya ug gipusil siya”, ni Isles pa.

Dugang ni Arce nga nangita sila og bidyo subay sa maong pagpanghulga. Apan kini mitataw nga kasagaran sa mga sakop clearing operations team nakadungog gyud sa hulga.

Nasayran nga mag-usa ka tuig na sa PROBE si Arnulfo kinsa nanginahanglan karon og tulo ka bag sa dugo nga type O positive. Si Cebu City Mayor Tomas Osmeña mipahibawo sab nga abagahon niya ang tanang bayrunon ni Cadungog sa tambalanan.

Gitataw ni Arce nga bisan sa nahitabo dili kini makapaluya kanila sanglit igo ra silang mihimo sa ilang trabaho. Nangita siya karon og lakang alang sa seguridad sa iyang mga tawo. (/DILT)(BANAT NEWS)