Lima sikop sa drug operations

CEBU, Philippines – Upat ka giingong nalambigit sa ginadiling drugas lakip niini menor de edad nga babaye ang nasikop sa gipahigayong buy-bust operation sa kapolisan diha sa Barangay Basak San Nicolas niadtong  Miyerkules sa gabii ug kagahapon sa kadlawon.

Unang operasyon nahitabo diha sa Sitio Tabay Alumnos, Barangay Basak San Nicolas niadtong Miyerkules sa gabii diin nasikop ang usa ka menor nga babaye kinsa residente usab sa maong lugar.

Nasakmit gikan sa maong menor ang usa ka paketeng shabu ug P200 nga buybust money ug laing pito ka gagmay’ng nga pakete, usa ka medium nga pakete nga shabu. Sa laing operasyon gipahigayon diha sa Sitio Kalubihan, Bontores St., sa maong barangay kagahapon sa kadlawon diin nasikop sila si Kevin Casinillo Mendoza, 37,  Junnel Dalmas Paredes, 28 ug Alain Doldoliya Encalado, 53, pulos residente sa maong lugar.

Nasakmit gikan sa mga suspetsado ang siyam ka gagmay nga pakete ug tulo ka medium ug laing duha ka gagmay’ng pakete nga shabu ug digital weighing scale,  P100 nga buy-bust money, P400 nga gitouhang halin sa ilegal nga drugas.

Sa laing bahin, usa ka giingong adik ang nasikop human kini giingong nagkit-an nga nagbitbit og ilegal nga drugas mga polis nga nag-foot patrol diha sa Sitio Salvador, Barangay Tanke, Dakbayan sa Talisay niadtong Miyerkules sa gabii.

Ang suspetsadon mao si Jomarbe Velvestre, 23, taga Lower Maghaway sa maong siyudad ug nasakmitan og duha ka gagmay’ng pakete sa shabu nga giingong iyang konsumoRowena D. Capistrano ug Gabriel C. Bonjoc/BDB(BANAT NEWS)