Mananga Bridge repairs nadelatar

CEBU, Philippines — Nadelatar nasab ang laing pagpaayo sa Mananga Bridge 2 sa Barangay Tabunok, Dakbayan sa Talisay tungod kay wala makapangandam ang siyudad.

Kini human nakalitan ang kagamhanan sa Syudad ug wala sila nakapangandam.

Si Atty. Rudelyn Navarro, city administrator sa dakbayan nitataw nga nakalitan gyud  sila kay wala may abiso nga ilang nadawat nga pasirad-an ang north -bound lane sa maong taytayan.

Kon dunay lane sa maong taytayan nga sirad-an kanunay kining momugna og grabeng problema sa trapiko abot hangtud sa Tabunok.

Niadtong Huwebes sa hapon mao ang pagsugod sa pagsira sa maong taytayan hinungdan nga ang south-bound lane gitunga ngadto sa duha ka lanes.

“Ato sa nga klarohon kung unsa ang extent sa damage ug klarohon sab nato kung unsa ang extent sa ilang trabaho. Gani samtang sila magtrabaho maayo unta nga magamit ang one lane,” matud pa ni        Navarro.

Sa panagtigum tali nila ni Department of Public Works and Highways (DPWH) maintenance head Faustino Dela Cruz Jr.; Cebu Province Traffic Czar Joy Tumulak ug Atty. Navarro hayan nakakab-ot gyud sila og kasabutan.

Ilang nauyonan nga ablihan lang una pagbalik ang maong taytayan sud sa 15 ka adlaw aron makahimo og comprehensive traffic plan inubanan sa kadagkuan sa City of Talisay-Traffic Operation Development Authority (CT-TODA).

Si Dela Cruz Jr. nagkanayon nga kung dili ayuhon ang maong taytayan hayan mas modako ang problema kon modako ang kaguba nga bahin niini. Nakasabot usab siya nga kinahanglang planuhon usab ang trapiko tungod kay daghan ang apektado niini.

“Ato lang una nga I divert ang dagko nga mga sakyanan adto sa South Road Properties (SRP) aron mamenusan ang trapik sa lugar,” matud pa ni Tumulak.

Una nang nadelatar ang maong proyekto tungod sa pagmagahi sa mga informal settlers nga nagpuyo ilawom sa taytayan.

Ang budget sa maong pag-ayo sa taytayan niabot sa P44 milyones. Kagahapon gibuksan ang duha ka lanes niini. (/IBM)(BANATNEWS)