Nilangoy padung sa bohol aron managkot

CEBU, Philippines — Namasin ug nilangoy ang usa ka mamasurahay diha sa kadagatan sa Syudad sa Sugbo paingon unta sa Probinsya sa Bohol aron managkot og kandila para sa iyang mga ginikanan apan wa pa gani siya makaabot sa tunga-tungang bahin sa Sugbo ug Bohol hayan nibigay na ang iyang lawas.

Si Ceferino Angco, 48, taga Calatrava, Carmen sa Probinsya sa Bohol naluwas sa mga sakop sa Fisheries Sea Ecological Care (FISECA) sa Syudad sa Talisay niadtong Domingo sa alas-8 sa buntag.

Matud pa ni Angco  sa Banat News napul-an na siya sa iyang kinabuhi isip mamasurahay maong nakahuna-huna siya nga mouli sa ilang probinsya ug aron makapanagkot sab sa iyang ginikanan ug mga igsuon nga nitaliwan na sa laing kalibutan kay hapit na ang kalag-kalag.

Gisugdan ni Angco ang iyang paglangoy diha sa may South Road Properties (SRP) dili layo sa Pier Uno niadtong Sabado sa alas-11 sa gabii. Apan wa magdugay sa iyang paglangoy gibikogan siya sa iyang tuong batiis ug bukton.

Maayo nalang sab gani kay nakagakos siya sa styrofoam nga naglutaw hinungdan nga siya nakapahuway ug nagpautaw-utaw nalang.

May mananagat nga nakakita ni Angco ug gipangutana siya kon asa kini padung ug iya rasab kining gitubag nga mouli siya sa Bohol. Ang maong mananagat pag-abot sa baybayon sa Talisay nitug-an sa taga FISECA hinungdan nga ilaing giapas si Angco ug gidala kini balik sa baybayon nga pwerte nang lapuya sa lawas.

Way kapaingnan

Naabot si Angco sa Sugbo niadtong tuig 2006 ug nipuyo sa iyang mga kabanay diha sa Dakbayan sa Lapu-Lapu. Apan nilabay ang mga tuig nibalik sa Bohol si Angco. Nabalik sab siya sa Sugbo niadtong tuig 2011 ug nipuyo sa iyang ig-agaw sa Labangon, Siyudad sa Sugbo.

Niadtong 2013 nibiya sa panimay sa iyang ig-agaw kay wala na siya ganahi sa batasan niini. Sukad niadto namasura nalang siya ug diha matulog sa sidewalk sa Colon.

“Mokaon nalang gyud ko og mga sobra-sobra nga ipanghatag sa mga tawo ilabi na nga wala koy kwarta,” asoy pa ni Angco. Siya nibutyag nga napul-an na gyud siya sa iyang kinabuhi mao nga nakahuna-huna siya nga mouli sa ilang probinsya.

Naa’y kwarta si Angco apan 80 pesos lang kini nga dili makaabo sa plitehan sa barko. Mauwaw sab siya nga mohangyo sa taga barko kay basin og siya makasab-an.

“Nakahuna-huna gyud ko nga maghikog nalang kay wala nama’y nagpakabana nako pero kay ganahan paman ko nga makapanagkot nisuway lang ko og langoy bahala na,” sigon pa ni Angco.

Sa ilang pamilya, ika 11 sa 12 ka mga anak si Ceferino. Namatay na ang iyang ginikanan ug lima ka igsuon.

Tinuod ang problema

Si Konsehal Antonio “Jojo” Bacaltos Jr., tsirman sa komitiba sa kalikupan niingon nga gipaubos medical examination si Angco pagabot sa baybayon ug gipaubos usab kini sa drug test ug nigawas nga negatibo ang resulta niini.

“Tarung man gyud kaayo siya nga estoryahon mao na nga nakaingon ko nga tinud-anay gyud to ang iyang problema,” matud pang Bacaltos.

Si Angco nitug-an nga aduna gyud sila’y gamay nga yuta sa Bohol kay naa man sila dapit sa bukid  kahibawo siya mananom tungod kay mag-uuma man gyud kini.

Gumikan niini si Bacaltos nihatag og mga liso nga matanom ni Angco aron iyang magamit kon maabot na siya sa ilahang lugar.

Gitagaan og pinansyal nga hinabang si Angco ni Bacaltos ug gipasakay sa barko.  “Amo lang gyud nga gihatud sa barko ug gitagaan og suwat ang iyang adtoan aron dili na maglisud-lisud si Angco,” matud pa ni Bacaltos.

Nagpasalamat sab si Bacaltos kay pinaagi sa social media sa Banat News ug The Freeman diha sa Facebook adunay mga nakigkita ni Angco sa pantalan ug mitunol sa ilang hinabang personal.

Mga 1:20 sa hapon nahatud ni Bacaltos si Angco sa barko. Ila sab nga gikontak ang taga Department of Social Welfare and Development (DSWD) sa Bohol aron ma asistihan si Angco. (BANAT NEWS)