Cebu Media gitudloan bahin sa ilang seguridad

CEBU, Philippines — Gilusad kagahapon sa Malacañang ang Nationwide Media Funshoot nga gihimo didto sa Camp Karingal sa Manila, didto sa Davao City  ug dinhi sa Cebu gihimo diha sa Aqua Firing Range sa Maghaway sa Dakbayan sa Talisay.

Ang maong kalihokan gipasiugdahan sa Presidential Task Force on Media Security sa Presidential Communications Operations Office pinangulohan ni Secretary Martin Andanar uban sa pagabag sa Philippine Practical Shooting Association (PPSA) ug Armscor Global Defense Incorporated.

Misalmot sa maong kalihokan ang mga sakop sa tri-media gikan sa pamantalaan, radio ug telebisyon. Sagad sa mga nanambong kadtong mga tigbalita nga naa sa gawas ang trabaho.

Nasayran nga daghan ng mga sakop sa media ang nakalas nga gituohang may kalambigitan sa ilang trabaho. Ang labing uwahi niini mao ang pagpatay sa broadcaster nga si Joey Llana didto sa Legazpi City sa Albay province niadtong bulan sa Hulyo.

Ang International Federation of Journalists (IFJ) miingon nga ang pagpatay kang Llana nagpamatuod lang unsa ka peligro ang trabaho sa media dinhi sa nasud ug giawhag ang gobiyerno paghimo og aksyon aron mahunong na kini.

Ang Reporters Without Borders (RSF) mihulagway nga seryoso kini nga hulga sa kagawasan sa prensa. Gimando na ni Presidente Duterte ang paghimo og lawom nga imbestigasyon bahin sa maong hitabo.

Si PCOO Director Juniño “Bonito” Padilla nga usa usab ka Sugboanon miingon nga kabahin kini Administrative Order No. 1 ni Presidente Rodrigo Duterte nga protektahan ang mga sakop sa media gikan sa bisan unsang hulga tungod sa klase sa trabaho nga nag-abay kanila.

Matud ni Padilla usa sa mga paagi aron maprotektahan ang media mao ang edukasyon pinaagi sa pagtudlo kanila sa pagbantay sa ilang seguridad ug kabahin niini ang pagkat-on sa luwas nga paggamit sa pusil.

"Education is the best weapon. We want to educate you on how to handle a gun. Basic instruction ni. Busa naa ta ron nag pahigayon ug shootfest para pag edukar sa basic handling of handgun,” sumala pa niya.

Gawas sa pagtudlo sa gun safety ug bisan nagbunok ang uwan, gitudloan usab ang mga sakop sa media sa personal security awareness niini ug sa ilang pamilya.

Gitudloan usab bahin sa gitawag og “every day carry” o ang mga tukmang mga butang nga dad-on sa usa ka indibidwal may kalabotan sa ilang mga trabaho nga madali-dali nilang gamiton panahon sa emerhensiya.

Nanghatag usab si Padilla og Media Security Handbook nga diin gitudlo ang mga angay bantayan sa media ug kon unsay buhaton aron sila makalikay sa peligro.

Human sa kalihokan gihimo dayon ang awarding ceremony sa mga labing maayong mga sakop sa media sa paggamit sa armas babaye ug mga lalaki. (BANATNEWS)