Way shabu sa Talisay, Naga CJ
CEBU, Philippines — Walay drugas apan adunay kontrabando gihapon nga nasakmit ang mga awtoridad dihang gihimo ang greyhound operation sa Talisay City Jail kagahapon sa buntag.
Si Supt. Gil Inopia, warden sa TCJ, nibutyag nga dili na bag-o nila ang greyhound operation tungod kay kada adlaw sila naghimo niini aron maseguro nga wala nay drugas ingon man gipangdili nga mga butang nga makasulod sa prisohan.
Sulod sa ikatulong kwarter niining tuiga, nakahimo na sila og 44 ka greyhound operation.
Sa ilang greyhound operation ilang nasakmit ang tin foil, lima ka shaver, usa ka set sa series lights, usa ka ballpen, usa ka lapis, duha ka lighter, duha ka buak nga bildo, usa ka screw driver, usa ka metal wire, duha ka kurtina ug duha ka guba nga stove.
Ang mga piniriso sa TCJ niabot na sa 762 diin 688 niini mga lalaki samtang 74 ang mga babaye.
Samtang nipahigayon sab sa ilang greyhound operation ang Naga City Jail diin nasakmit ang tulo ka nail cutter, duha ka battery ug usa ka stick ug razor blade.
Si Mark Tuñacao, warden sa NCJ, nagkanayon nga ikaduha pa kini nilang greyhound operation sukad siya nadestino niadtong Agosto.
Adunay 12 ka selda ang ilang pasilidad diin 10 niini sa mga lalaki samtang duha sa mga babaye.
Niabot na sa 395 ka piniriso sa NCJ diin 363 ang mga lalaki samtang 32 ang mga babaye. (BANAT NEWS)
- Latest
