32 tawo nabiktima sa ATM skimming devices

CEBU, Philippines - Gitug-an ni Konsehal Dave Tumulak, Deputy Mayor for Police Matters nga daghan siya karong nadawat nga reklamo gikan sa mga nabiktima niining ATM skimming.

Ug ning tungora, kadaghanan mga empleyado sa gobiyerno gikan sa National Food Authority, Department of Environment and Natural Resources (DENR) ug ang Regional Director sa Population Commission (PopCom)-7.

Matud pa nakugang sila sa dihang mag-withdraw unta sila niadtong adlaw’ng Sabado wala nay sulod ang ilang mga ATM cards maong nireklamo sila sa Bangko Sentral ng Pilipinas (BSP) ug sa bangko sa ilang ATM nga nawala ang ilang kwarta.

Niadtong Nobiyembre 29 sa miaging tuig mipasar og resolution ang konseho nga nag-awhag sa BSP ug Cebu Bankers Association nga pahugtan ang seguridad sa mga ATM booths aron di makahigayon ang mga kawatan pagmuntar sa ilang mga skimming devices. Kini sama sa pagmuntar og CCTVs, kanunayon ang physical inspection sa mga makina ug pahibaw-on ang bank account holder kun aduna’y withdrawal nga moabot og P5,000 pataas. Ug kinahanglan pahibaw-on sa bangko ang mga otoridad alang sa posibleng imbestigasyon. Kining tanan matud pang Tumulak wa buhata sa mga bangko hangtud karon.

Matud pa niya milyones ang nahanaw sa kwartang hinagoan sa mga biktima nga gisalig nila sa bangko maong dako kini og epekto ug hulga sa seguridad. Sulod sa walo ka buwan miabot na sa 32 ka tawo ang mireklamo kalabot niining ATM skimming.

Tungod sa maong insidente, ang NFA-7 ug POPCom-7 di na modeposito sa ilang payroll sa bangko.      

“Kay kuyaw man sad gud basin mawagtang na sad ang sweldo sa among mga empleyado,” matud pa ni NFA-7 Director Olma Marie Bayno. Decemay Padilla ug Mitchelle Palaubsanon (BANAT NEWS)