63 ka balay naugdaw na pud sa Barangay Suba

CEBU, Philippines - Dili pa lang gani dugay dihang miigo ang dakong sunog sa Sitio Tagutungan, Brgy. Suba ning Dakbayan sa Sugbo ug wala pa makabangon sa hingpit ang mga nasunogan, lain na usab nga sunog ang miulbo sa mao gihapong barangay.

Nabulabog ang mga residente sa Sitio Wakwak Block 1, General Gines ug Belgium St.  dihang  miulbo ang dakong sunog ug dili mominus 63 ka mga balay ang naugdaw samtang pito ang nakan-an sa kalayo. Nadawat sa mga kabomberohan ang alarma sa sunog alas 11:28 kagahapon sa buntag nga giisa sa second alarm.

Matud ni Chief Inspector Rogelio Bongabong Jr., Fire Marshal sa Cebu City Fire Department nakontrolar ang sunog alas 12 sa udto ug kini giingong nagsugod sa panimalay ni Lorena Gaspar Bitor.

Sagad sa mga balay ginama sa light materials, samtang nakan-an usab sa kalayo ang Cebu City Fish Market. Wala ra usab naglisod ang kabomberohan sa pagsulod sa dapit tungod kay gawas nga lapas ang agianan duna say dakong hawan kun diin didto nag-standby ang mga fire trucks.

Si Suba Brgy. Kapitan Jojo Sable miingon nga dili na nila tugotang makatukod og balik ang mga residente og mga stalls daplin sa dalan ug kinahanglan sunod na gyud ang Site Improvement Resettlement(SRI).

Nasuta nga dunay naangol sa maong hitabo nga si Marvin Cabilao, 32, nga miluwas sa iyang mga anak apan nagkasamad-samad kini ug napaso-paso.

Gibana-banang moabot sa P700 mil ang danyos sa maong sunog ug padayon pa usab nga gisuta kun unsay hinungdan niini.

Apan usa ka Dennis Cardenis, silingan sa balay diin nagsugod ang sunog miingon nga nisyagit si Lorna ug nangayo og tabang tungod kay kalit nikayo ang tubo sa stove nga gigamit niini, apan dili na niya matabang tungod kay dali kaayong nidako ang kalayo. Tungod sa kapaspas sa hitabo, naniguro na lang sila sa iyang pares pag-ikyas nga walay nabitbit bisan  gamay sa ilang mga sapot.

Ang mga biktima sa sunog temporaryo nga ipahiluna sa Suba Sports Complex. (BANAT NEWS)