Tulisan nisuksok sa imburnal

CEBU, Philippines - Nasikop sa mga sakop sa Waterfront Police Station ang usa ka tulisan kinsa nitago sa imburnal ilawom sa taytayan sa dalan Logarta, San Roque, Dakbayan sa Sugbo.

Ang nadakpan naila nga si Benson Villaro, 27-anyos, ulitawo, taga Sitio Banting sa maong lugar,

Si Villaro gitumbok nga nitulis nilang Arnel Escobido, 38, lumad nga taga Tagum City ug Dionesio Tugap, 22, lumad nga taga Bohol atol sa ilang pagpamauli gikan nag-inom sa dalan Colon.

Nakuha gyud gikan kang Escobido ang P1,500, cellphone ug silver nga kwentas ang nakuha gikan sa iyang kauban.

Una silang nidangop sa Parian Police Station apan gi-turn-over sila sa Waterfront Police Station kinsa maoy nihimo sa follow up operation sa Sitio Banting ug didto positibo nga naila ang suspek kinsa dali nga nakadagan.

Nahitabo ang ginukdanay ug nitago ang suspek sa imburnal apan ang grupo ni SPO2 Reynold Malazarte ang nisuhid ug didto nakit-an ang likod nga bahin sa lawas sa suspek nga pwerteng suksok hinungdan nga giawhag nga mogawas ug dili magpakita sa pagsukol.

Dihang nakagawas na si Villaro, nagpakitabang kini sa iyang inahan ug suway nga nikuyog sa pagpangita sa iyang duha pa ka kauban apan wala na kini igkita. (BANAT NEWS)