Papa, anak patay

CEBU, Philippines – Tungod lang sa iro nga pinasagdan, patay ang manag-amahan ug anak nga nagsakay og motorsiklo human sila nagkabangga sa usa ka delivery van nga gimaneho sa usa ka Chinese national sa miaging hapon diha sa Barangay Cantuod sa lungsod sa Balamban.

Gideklarar nga patay pag-abot sa Cebu Provincial Hospital sa Balamban sila si Danny Bolongaita, 46, ug ang iyang anak nga si Mary Joy, 12, taga Barangay Aliwanay, Balamban luwan sa motorsiklo.

Samtang ang drayber sa delivery wing van mao ang Chinese national nga si Conghai Zhu, 38, nagpuyo sa Barangay Poblacion, Carcar City.

Si Police Officer 3 George Realista, desk officer sa Balamban Police Station miingon nga ang amahan ug anak padulong sa ilang balay samtang ang van padulong sa Balamban Proper.

Base sa imbestigasyon nga gihimo sa traffic investigator sa maong estasyon,  adunay gilikayan nga iro si Danny nga kalit lang milabang sa dalan apan napunta sila pikas bahin ug nasampak sa gikasugat nga wing van.

Nasampak sa wing van ang motor hinungdan nga nakahiagom ang manag-amahan og grabeng kadaot sa ilang lawas ug patay na dihang nahiling sa mga doktor.

Si Zhu gikostudiya dayon sa kapolisan human sa hitabo apan matud pa ni Realista nga nagkasinabot ra ang duha ka habig human nipasalig ang drayber nga maoy moabaga sa pagpalubong sa mga biktima. – /EIM) (BANAT NEWS)