Illegal gun makers gironda sa CIDG-7

CEBU, Philippines - Lain na sab nga pagpangronda ang gihimo sa mga sakop sa Criminal Investigation and Detection Group sa managlahi’ng dapit sa dakbayan sa Danao sa nakalabay nga adlaw batok sa mga ilegal nga tigbuhat og mga armas.

Atol sa operasyon, usa ang nasikop ug usa ang naka-eskapo diin mga armas ug mga bala ang nasakmit sa kapolisan.

Ang grupo nga gipangulohan ni Supt. Fermin Armendarez III ang una’ng nironda sa Tuburan Village, barangay Tuburan pasado ala una sa hapon.

Nasikop si Juntilla Pepito, hingkod nga naaktohan nga naghimo og armas.

Duha ka shot guns ug nagkadaiyang parti sa armas nga wala pa na-assemble ang nakuha sab sa mga awtoridad.

Sunod nga giadto sa mga polis ang barangay Poblacion apan ang target nga si Nomer Prieto ang nakasibat human nakamatikod sa presensya sa mga polis.

Ang kapolisan nakarekober og usa ka shot gun ug nagkadaiya’ng parti sab sa lainlaing klase sa mga armas.

Ang operasyon naglakip sa programa nga PNP Oplan Paglalansag Omega, usa ka programa batok sa mga ilegal nga armas.

Gumikan sab kay nagsingabot na ang piniliay, gilauman sa kapolisan ang pagdaghan na sab sa mamahimo’ng kostumer sa mga manghimoay og ilegal nga armas nga sagad gamiton sa mga grupo sa politiko.

Una na sab nga nasayran sa CIDG-7 sa mga una na nila nga operasyon nga gihimo sa dakbayan sa Danao nga adunay mga politiko nga naggikan pa sa Mindanao ang maabot og pagpamalit og armas sa  mao’ng dapit ug kini ang tumong sa kapolisan nga ma-alkontrahan. (Jojo C. Ugdol/GMR)(BANAT NEWS)