Dispatser gidunggab patay

CEBU, Philippines - Patay ang usa ka dispatser human dunggaba sa usa ka drayber sa public utility jeepney (PUJ) sa eskina Pelaez ug Colon, dakbayan sa Sugbo pasado alas 12 sa nakalabay nga kadlawon.

Ang biktima giila lang sa pangan nga “Insik”, kapin sa 30-anyos ang pangedaron ug wala masayri kung asa nagpuyo.

Gitudlo’ng suspek sa krimen ang usa ka alyas “Eman” kinsa giingong usa ka drayber og PUJ.

Sa imbestigasyon sa homicide section sa Cebu City Police Office nga gipangulohan ni Senior Police Officer 3 Filomeno Mendaros ug kauban nasayran nga sa mao’ng oras nakit-an sa mga tawo sa lugar nga adunay gigukod ang biktima nga laing lalaki.

Wala naapsi ang lalaki hinungdan nga nisakay og PUJ ang biktima ug didto na nakit-an nga adunay samad dinunggaban sa iya’ng dughan.

Ang drayber sa gisakyan nga PUJ ang dali pa unta nga nidala sa biktima sa Cebu City Medical Center (CCMC) apan pipila ka minutos ang nilabay nakabsan gyud sa iya’ng kinabuhi. Ang kapolisan nagduda nga personal ang motibo sa mao’ng krimen.

Ang mga tawo sa lugar tak-om sab kung unsa ang hinungdan ug unsa’y giawayan sa duha.  (BANAT NEWS)