Talisay andam na sa kalag-kalag

CEBU, Philippines – Usa ka semana sa dili pa ang kalag-kalag, siyento porsiyento na nga andam ang kapolisan sa dakbayan sa Talisay sa ila’ng paghatag og seguridad sa katawhan nga mobisita sa mga sementeryo.

Si Supt. Germano Mallari, hepe sa kapolisan sa siyudad, nagkanayon nga aduna sila’y lima ka sam-ang nga bantayan diin  duha ang pribado samtang tulo ang pangpubliko.

Ila’ng tagaan og daku’ng pagtagad mao ang tulo ka pangpubliko’ng sam-ang sa Tanke, Cansojong ug Poblacion.

Gani nakig-coordinate na siya sa mga barangay kapitan aron ang ila’ng mga tanod ang motabang sa pagmintinar sa kahapsay ug kalinaw.

Sama sa naandan, gidili ang mga hait nga butang, ilimnong makahubog ug pagsaba-saba sulod sa mga sementeryo.

Sugod sa petsa 31, makita na ang mga polis ilabi na sa petsa 1 ug 2 ug alerto niana’ng panahona.

Nanghinaut si Mallari nga dili mokompiyansa ang katawhan aron malikay sa mapahimuslanong tawo.

Gawas sa pagbantay sa kaugalingon, angay sab nga seguraduhon ang mga kabtangan nga naa sulod sa panimaye.

Sigun pa niya nga kung mobiya sa panimaye seguruhon nga sirado ug adunay tawo nga tugyanan sa pagbantay.

Karong semanaha dugang pa ni Mallari mao na ang iya’ng pagsuroy sa mga sementeryo sa pagsusi kun aduna pa bay usbon sa iya’ng pag-deploy sa kapolisan. – /GMR) (BANAT NEWS)