Market Administrator gireklamo

CEBU, Philippines - Nag-viral karon sa Facebook ang usa ka video nga nagpakita sa usa ka lalaki nga mikasaba ug midagmal sa usa ka mabdos nga fruit vendor ug gialegar pa nga gitionan kini og armas sa maong lalaki niadtong Lunes.

Ang maong babaye sa video mao si Oshin Rose Fernandez, 25, residente sa maong dapit kinsa pito ka buwang mabdos.

Ang lalaki sa video mao diay ang market inspector sa lungsod sa Minglanilla nga si Ramsi Sayson. Ang duha makita sa video nga nagkatinubagay tungod sa nakaali sa karsada nga kariton ni Fernandez.

Apan si Fernandez mipasangil nga igo ra siyang naghan-ay sa kinompra nilang buwak ug prutas diha sa ilang kariton kilid sa karsada kay nangasilyas pa iyang bana.

Matud pa ni Fernandez dihang nakaagi si Sayson, gibadlong siya niini. Apan wa niya mapadaplin ang kariton kay wa pa iyang bana ug di siya makadaog pagtulod sa kariton.

Apan matud pa niya, nisinta og kalit si Sayson ug gikuha ang ilang timbangan hinungdan nga iya kining gigukod ug nitumaw ang komosyon.

Sumala pa ni Fernandez gikumot ni Sayson ang iyang dagway ug gisagpa pa gyud siya niini.

Ang komosyon sa duha nakuhaan og video sa usa ka concerned citizen nga mi-upload  niini sa social networking sites ug nag-viral dayon.

"Abusado na gyud kaayo nang tawhana. Nakainom siya nga mihimo sa pagbadlung. Dili unta ko niya nga ingon anion kay babaye ko unya mabdos pa gyud," matud pa ni Fernandez sa mga tigbalita.

Apan si Sayson sa iyang bahin nibutyag sa mga tigbalita nga igo ra siyang nipatuman sa ordinansa sa lungsod nga gidili ang  pagpaninda diha sa dalan.

Matud pang Sayson, igo ra siyang nibadlong kang Fernandez apan wa kini nipatuo mao nga iyang gikuha ang timbangan imbes ang mga paninda.

"Ako ra ni silang mga paryente pero bati paminawon nga dili sila mabadlong kay abi pa lang aduna tay gipaboran," nagkanayon si Sayson.

Siya nagkanayon nga nibalhin sa ilang kariton ang mga Fernandez apan diha lang gihapon sa karsada gibutang.

Iyang giangkon nga iyang ‘nahikapan’ ang dagway ni Fernandez tungod kay nisuway kini og kuha og kutsilyo ug gihapsan siya niini og payong.

Apan iyang gihimakak ang pasangil nga siya nanion og armas kay wa siya niini ug dili siya pulis. Iyaha usab gihimakak nga nakainom  siya niadtong higayuna kay dili naman siya moinom sa dugay nang panahon.

Si Chief Inspector Richard Gadingan, hepe sa kapulisan sa lungsod sa Minglanilla miawhag sa duha ka habig nga mopatim-aw sa ilang buhatan kun aduna sila’y planong magkinihaay.

Sa nasayran, ang igsuon ni Fernandez nadakpan sa susamang kalapasan ug kini gipriso gyud sa mga otoridad niadtong nakalabay’ng buwan.

Si Mayor Elanito Peña sa lungsod sa Minglanilla ang nidapig kang Sayson pagkakita sa video kay matud pa niya ang naka-provoke sa kagubot mao gyud ang babaye.

Di sab motuo ang mayor  nga nanion og armas si Sayson. Matud niya  nihimo lang kini sa iyang trabaho. (BANAT NEWS)