Nangisda sa mabaw nga kadagatan gipangdakop

CEBU, Philippines – Nasikop sa kapolisan ang 16 ka mananagat nga gikan sa Negros Oriental human sila nasakpan nga nanagat sa mabaw’ng bahin sa kadagatan sa lungsod sa Tuburan kagahapon sa buntag.

Ang nadakpan naglangkob sa kapitan sa bangka’ng panagatan nga si Lucio Desuyo Jr., ang iyang mga sakop nga sila si Renato Azucena Jr., 31; Norie Villaflor, 34; Jay Almencion, 29; Rolando Gimeno, 30; Raymond Aragon, Tali de Julian, 30; Renie Azucena, 35; Sardu Sibonga, 28; Rodito Mislos, 36; Ricky Amayna, 26; Edwim Pinunggan, 40; Benjie Blancaflor, 29; Ricky Melgar, 36; Renbo Malokos, 36; ug si Willy Cordova, 35, nga pulos taga Negros Oriental.

Ang panagatan nga ilang gisakyan mao ang Dorothy-2 ug gipanag-iya ni Edwin Coronel.

Si PO3 Pablo Arnoco, desk officer sa Tuburan Police Station, miingon nga ang bangkang pangisdaan naatlan sa kapolisan sa Tuburan nga nagpahigayon og seaborne patrol didto sa gitawag og Kamingawan Shoal.

Matud pa nga ang pangisdaan nga Dorothy-2 migamit sa ilegal nga panagat nga gitawag og "Sipper," nga adunay active gear ug nakit-an pa g’yud sa kapolisan nga mitaktak kini og pukot nga pino og mata didto sa Kamingawan Shoal.

Ang lagda sa Republic Act 8550, kon Fishery Code of the Philippines, naglatid nga gidili ang pukot nga ang mata ubos sa tres sentimetros kun unaton aron dili makapuo sa mga gagmay’ng isda.

Ang kapitan wala makapakita og roll book sa mga tripulante ug wala ‘sab sila makapresentar og fisherfolk license hinungdan sa ilang pagkasikop.

Gisakmit ang ilang pukot, lakip na sa upat ka banyera nga isda nga mobalor og P6 mil.

Hinuon gibuhian ra usab ang maong mga mananagat human makabayad sa tukma nga multa sa ilang kalapasan. – /RUB) (BANAT NEWS)