Tunghaan sa Labogon gisug-an sa VECO

CEBU, Philippines - Gihangop sa mga magtutudlo ug mga tinun-an ang gipalambo nga suga’ng dagitabnon sa 15 ka lawak-saringan sa Labogon Elementary School, dakbayan sa Mandaue.

Ang nahisgutang publiko’ng tunghaan mao’y kabahin sa nakapahimulos sa gipasiugdahang programa sa Visayan Electric Company (VECO) nga gitumong dili lang sa paghatag og dugang kahayag sa panahon sa gabii kun dili sa paglikay usab sa lungkab sa mga kawatan panahon sa gabii.

Libre kini nga gihatag sa VECO diin makapahimulos ang 700 ka mga tinun-an sa elementarya ug lakip na usab ang mga magtutudlo sa mao’ng tunghaan.

Si Eric Ching, community relations manager sa Reputation Enhancement Department sa VECO, ang nangulo sa ceremonial turnover ngadto kang Jeverlie Canoy, ang prinsipal sa tunghaan.

Nitambong usab sila si Bise Mayor Glenn Bercede, Konsehal Jimmy Lumapas ug si City Schools Division Superintendent, Dr. Virginia Zapanta.

“We are now feel secure and have peace of mind and enjoy the convenience of well-lighted classrooms and hallway,” matud ni Canoy.

Gihangop usab sa mga ginikanan sa mga tinun-an ang proyekto nga gibanabana nga nigasto og P300,000.

Si Labogon barangay kapitan Renato Suson kinsa mao usab ang pangulo sa Parent-Teacher Association ang nipadayag usab og kahinangop sanglit sa makadaghang higayun sa ila’ng pag-ayo sa mga suga sa tunghaan nasinati na nila nga hapit gyud naaksidente sa kuryente.  (BANAT NEWS)