Pusher wa na kaikyas sa ikaduha’ng higayun

CEBU, Philippines - Kantidad sa kapin P300 mil nga gituohang shabu ang nasakmit sa mga sakop sa City Intelligence Branch sa Cebu City Police Office gikan sa gidudahang level 2 drug pusher atol sa buy-bust operation pasado alas 2 sa nakalabay nga kadlawon sa A. Lopez Street, Mahayahay, Calamba.

Ang dinakpan naila nga si Melchor Villanueva, 46, nagpuyo sa mao’ng dapit.

Niadto’ng Abril gironda na sa CIB ang suspek apan nakaikyas ug ang kapuyo nga si Maria Liza Diaz, 42, namatay human natuhog sa kabilya diha’ng niambak sa atop sa balay sa suway nga pagsibat.

Sumala pa ni Supt. Romeo Santander, hepe sa CIB, nga nahinabi sa mga tigbalita nga human nila nadawat ang impormasyon, subli sab sila nga naghimo og plano aron madakpan si Villanueva.

Human natunol sa suspek ang usa ka pakete sa gituohang shabu, abtik sab nga nihamag ang kapolisan hangtud nadakpan si Villanueva.

Nakuha sa kapolisan ang upat ka gagmay nga pakete ug usa ka medium-size sa gituohang shabu nga kantidad og P354,000.

Si Santander nidugang nga ang ila’ng operasyon gihimo gihapon sa una’ng gipuy-an sa suspek human kini nibalik sa pagpuyo ug nipadayun sa negosyo.

Si Villanueva hugtanon nga nihimakak sa pasangil hinuon niangkon nga kaniadto nalambigit siya sa ilegal nga negosyo apan niundang na gumikan sa iya’ng mga sakit nga gibati.

Kaso’ng paghupot ug pagbaligya og shabu ang ipasaka sa kapolisan batok sa suspek kinsa gibalhug na sa selda sa CCPO.  (BANAT NEWS)