X-ray machines sa mga eskuylahan

CEBU, Philippines — Gisugyot ni Konsehal David “Dave” Tumulak ang pagpangayo sa Office of Transportation Security (OTS) sa Department of Transportation (DOTr) og mga bakante nga single-view X-ray baggage inspection machines aron magamit sa mga pampublikong tunghaan sa Dakbayan sa Sugbo.

Niduso si Tumulak sa maong resolusyon tungod sa mga insidente sa pagpamusil nga nahitabo sa mga tunghaan sa nagkadaiyang bahin sa Pilipinas kun diin  nagpakita sa panginahanglan nga palig-onon ang mga preventive security measures sulod sa mga tunghaan.

Ang X-ray baggage inspection machines mahimong makatabang sa pag-screen sa mga bag ug uban pang gidala nga butang sa mga tinun-an aron nga masuta ang mga gidili o posibleng delikadong mga butang nga mahimong masulod sa mga tunghaan.

Ang mga kahimanan ipakatap sa mga pampublikong tunghaan sa syudad aron makadugang sa seguridad ug makatampo sa paghimo og mas luwas nga learning environment alang sa mga tinun-an, magtutudlo, school personnel, ginikanan, ug mga bisita.

Mao nga nihangyo si Tumulak sa OTS, pinaagi sa Administrator niini nga si Usec. Gilberto DC Cruz nga konsiderahon ang hangyo sa kagamhanan ubos sa tanang resikitos, proseso, ug kondisyon sa ahensya aron madugangan ang  seguridad sa mga tunghaan ug  dili na sab masayang ang gasto sa kagamhanan ilabi na false alarm ang mga hulga sa mga tunghaan. — IBM BANAT NEWS