4 nasikop sa CIB, PDEA

CEBU, Philippines - Mokabat sa halos tunga sa milyon ka pesos nga kantidad sa shabu ang nasakmit sa mga sakop sa City Intelligence Branch (CIB) sa Cebu City Police Office ug Philippine Drug Enforcement Agency nga niresulta sa pagkasikop sa upat ka tawo.

Pasado alas 5 sa nakalabay nga kadlawon nadakpan ang usa ka gidudahang notado’ng tigpayuhot og shabu sa Gen. Maxilom Avenue, barangay Careta.

Ang dinakpan naila nga si Jeffrel Bartido, target sa kapulisan, ug nasikop sab ang usa ka babaye nga si Glyn Torregosa, hingkod  nga taga barangay Duljo-Fatima.

Gamit ang P500 nga buy-bust money nga sinagulan og budol nga kwarta, nakapalit og usa ka medium-size  sa gituohang shabu ang asset sa kapolisan hinungdan nga gisikop si Bartido.

Samtang si Torregosa nakuhaan sab og usa ka medium-size sa gituohang shabu.

Sulod sa balay nakuha ang dugang duha ka medium-size sa gituohang shabu nga mokantidad og P177,000.

Samtang ang mga sakop sa PDEA-7 nisikop sab sa duha ka lalaki atol sa ronda nga gihimo sa sitio Lawis, Pasil pasado alas 3 kagahapon sa hapon.

Target sa mga awtoridad ang magsuon nga sila si Alfie, 32, ug Apple Oyao, hingkod, apan si Alfie lang ang nadakpan kay wala sa balay si Apple.

Gamit ang P7,000 nga buy-bust money, nakapalit og usa ka daku’ng putos sa gituohang shabu ang asset sa PDEA-7 nga gitunol mismo ni Alfie.

Ang kauban ni Alfie nga iya’ng higala nga si Jhonil Canoy, 25, nikaratil og dagan human nakamatikod nga kini dakpon ug nahitabo ang ginukdanay paingon sa balay sa mga Oyao diin siya nadakpan.

Pinasikad sa search warrant, gisubay sa kapolisan ang balay sa pamilya’ng Oyao ug nakuha ang usa ka daku’ng bulto sa shabu nga gibutang sa altar sa lawak ni Apple.

Gitanggong na sa selda sa kapolisan ang mga dinakpan nga pasakaan og tukma’ng kaso. (Jojo C. Ugdol/GMR)(BANAT NEWS)