Revamp sa mga opisyal sa city hall ugma

CEBU, Philippines -  Dili g’yud daghan sa mga department heads sa Cebu City Hall ang maapektahan sa revamp nga ipatuman ni Mayor Michael Rama sugod ugma’ng adlawa.

Matud sa mayor nga ang kasayuran ug kausaban iyang ibutyag ugma atol sa press conference sa mga sakop sa City Hall Association of Reporters in Tri-Media (CHARM).

Bisan og wala pa ibutyag sa mayor, apan ang mga reporters nakakuha na og pasiuna nga inpormasyon gikan sa mga suod ni Rama.

Ang kasayuran nagkanayon nga ang kausaban ni Rama maglakip sa pagtudlo sa mayor og bag-ong chief of staff nga mao na unya si Atty. Dominic Diño nga karon mao pa ang City Hall Personnel head.

Si Diño matud pa hulipan ni Atty. Mary Ann Suson ug ang assistant city administrator nga si Jovy Morelos gikataho nga balhinon ug himuong assistant ni Suson. Ang giingong ipuli ni Morelos pagka assistant city administrator mao si Rannie Diola, nga igsuon og usa ka pari.

May report ‘sab nga sila si Dra. Gloria Duterte ug Atty. Chris Panugaling sa Cebu City Medical Center (CCMC), ibutang na ubos sa pagsuperbisar ni Dra. Lucelle Mercado, nga maoy acting city administrator.

Matud ni Mayor Rama nga dili kaayo daghan ang maapektahan sa iyang ipatuman nga revamp apan kadto’ng makita niya nga dili gihapon epektibo sa ilang katungdanan, ibalhin na usab og laing puwesto paglabay sa unom ka buwan.

Gitataw ni Rama nga ang ipatuman niya nga revamp gitumong aron mas molambo pa ang serbisyo sa City Hall ngadto sa katawhan.

Gawas ni Mayor Rama, ang iyang mga sinaligan nga naglakip nila ni MCWD Chairman Rene Mercado, kanhi konsehal Joy Pesquera ug uban pa maoy nagbayloay og huna-huna kun kinsa ang ibutang sa mga puwesto isip department ug assistant department head.

Kaniadto’ng Enero 2014, si Rama mipatuman usab og revamp sa iyang mga department head diin apil nga nabalhin mao si Atty. Jose Marie Poblete nga gihulipan sa mayor pagka city administrator ug gibalhin pagka city engineer.

Gihulagway sa mayor nga si Poblete haum g’yud kaayo nga modumala sa Department of Engineering and Public Works (DEPW) kay gawas nga usa kini ka abogado, si Poblete usa usab ka civil engineer.  (BANAT NEWS)