Habal-habal driver angol sa pagpamusil

CEBU, Philippines – Grabeng naangol ang usa ka habal-habal drayber kinsa gipusil sa duha ka armadong lalaki nga nagsakay og motorsiklo sa sitio Common, Daanlungsod, Medellin alas 2 pasado sa hapon niadtong Domingo.

Ang biktima mao si Dexter Godinez Chua, hingkod, nga nagpuyo sa maong dapit ug ang wala pa nailhi nga namusil duha ka lalaki nga pulos nag-bonnet.

Si Senior Police Officer 1 Ryan Castro sa Medellin Police Station miingon nga nagbarug lang daplin sa karsada ang biktima nga nakighinabi sa kauban nga mga habal-habal drayber nga sila si Lucio Rodriguez ug Francisco Sarmiento.

Kalit lang may nihunong nga motorsiklo sa luyo nga bahin ug gipusil ang biktima sa buko-buko sa makaduha ka higayun hinungdan sa pagkahagba niini.

Dali nga nipabulhot pahilayo paingon sa norte nga bahin ang namusil ug ang maguwang nga lalaki sa biktima nga diha atol sa hitabo ang dali nga nidala  sa biktima sa Bogo Provincial Hospital.

Matud ni Castro nga mohimo pa sila og dugang imbestigayon ug pagsuta kun kinsa ang gikaaway sa biktima. – /GMR) (BANAT NEWS)